एक दिवसाचा विलंब:मालेगावात उद्या 24 ‎तास पाणीपुरवठा खंडित‎

शहरातील मुख्य जलशुद्धीकरण‎ केंद्राला जोडणाऱ्या जलवाहिनीला‎ काही ठिकाणी गळती लागली‎ असून उंबरदे येथे जलवाहिनी‎ नादुरुस्त झाल्याने या कामांच्या‎ दुरुस्ती काळात शनिवारी शहरातील‎ पाणीपुरवठा २४ तासांसाठी खंडित‎ करण्यात येणार आहे,अशी माहिती‎ महापालिका पाणीपुरवठा‎ विभागाकडून देण्यात आली आहे.‎ शहराला तळवाडे पाणी साठवण‎ तलाव तसेच गिरणा धरणातून‎ पाणीपुरवठा केला जातो. चणकापूर‎ धरणातील पाणी तळवाडे येथे‎ साठवले जाते. येथून गुरुत्व‎ वाहिनीने ते जलशुद्धीकरण‎ केंद्रापर्यंत येते.

तसेच गिरणा‎ धरणातूनही पाणी पंपिंग करून‎ सायने येथील जलशुद्धीकरण केंद्रात‎ आणले जाते. या दोन्ही‎ जलशुद्धीकरण केंद्रांना पाणीपुरवठा‎ करणाऱ्या मुख्य जलवाहिन्यांना‎ काही ठिकाणी गळती लागली आहे.‎ यामुळे मोठ्या प्रमाणात पाणी वाया‎ जाते. या जलवाहिन्यांची दुरुस्ती‎ करण्यासाठी येथील पंपिंग एक‎ दिवसासाठी बंद करावे लागणार‎ आहे. यामुळे जलशुद्धीकरण‎ केंद्राला पाणीपुरवठा होण्यात एक‎ दिवसाचा अडथळा होईल. या‎ काळात शहरासाठी नियोजनानुसार‎ पाणी उपलब्ध होणार नाही. त्यामुळे‎ शनिवारी शहरात पाणीपुरवठा‎ खंडित केला जाणार आहे.‎ दिवसभरात ही सर्व कामे वेळेत पूर्ण‎ होणे अपेक्षित आहे. यानंतर‎ रविवारपासून नियोजित‎ वेळापत्रकानुसार शहरात‎ पाणीपुरवठा केला जाईल. अर्थात‎ ज्या भागात शनिवारी पाणीपुरवठा‎ होणार होता, त्या भागात रविवारी‎ पाणी पुरवठा होईल. अशा पद्धतीने‎ शनिवार नंतर नियोजित‎ वेळापत्रकात एक दिवसाचा विलंब‎ पडणार आहे. या काळात‎ नागरिकांनी महापालिकेला सहकार्य‎ करावे, असे आवाहन प्रशासनातर्फे‎ करण्यात आले आहे.‎