रिक्त जागांची यादी जाहीर:डिप्लोमा फार्मसीसाठी प्रवेश,  विद्यार्थ्यांना आज शेवटची मुदत

गेल्या सहा महिन्यानंतर अखेर डिप्लोमा फार्मसी अभ्यासक्रमाच्या प्रवेश प्रक्रियेला सुरुवात झाली आहे. पहिल्या फेरीसाठी निवड यादी जाहीर झाल्यानंतर विद्यार्थ्यांना संबंधित महाविद्यालयात प्रवेश घेण्यासाठी सोमवार (दि. १२) ही अंतिम मुदत देण्यात आली आहे. १३ डिसेंबरला दुसऱ्या फेरीसाठी रिक्त जागांची यादी जाहीर होईल. नाशिकमध्ये डिप्लोमा फार्मसी अभ्यासक्रमाची ३२ महाविद्यालयांत दोन हजारांहून अधिक जागा उपलब्ध आहे. प्रवेशासाठी एकूण तीन कॅप राउंड होणार आहेत. डी. फार्मसी प्रवेश अर्ज नोंदणी प्रक्रिया जून महिन्यात सुरु झाली होती. त्यानंतर वारंवार मुदतवाढ देण्यात आली.

तब्बल पाच ते सहा महिने केवळ प्रवेश अर्ज नोंदणीची प्रक्रिया सुरू होती. अखेर डिसेंबरमध्ये प्रत्यक्ष प्रवेश प्रक्रियेला सुरुवात झाली. त्यानुसार ८ डिसेंबरपर्यंत पहिल्या फेरीसाठी पसंतीक्रम नोंदविण्यासाठी मुदत होती. तर ९ डिसेंबरला निवड यादी झाली. त्यात संधी मिळालेल्या विद्यार्थ्यांनी प्रवेशासाठी १० ते १२ डिसेंबर या दरम्यान मुदत आहे. तर १३ डिसेंबरला रिक्त जागांचा तपशील प्रसिद्ध होईल. त्यानंतर १४ व १५ रोजी पसंतीक्रम नोंदवता येईल. १६ राेजी निवड यादी जाहीर होऊन १७ ते १९ डिसेंबरपर्यंत प्रवेशाची संधी असेल.