एकास अटक, चाैघे फरार:गाेळीबार झाल्याने अंबडला तणाव; आर्थिक वादातून भंगार बाजारात घटना

अंबड येथील भंगार बाजारात दोन व्यावसायिकांमधील आर्थिक वादातून हवेत गोळीबार करीत दहशत निर्माण केल्याचा प्रकार बुधवारी (दि. ९) रात्री घडला. अंबड पोलिसांत गुन्हा दाखल करण्यात आला आहे. या घटनेमुळे अंबड एमआयडीसीसह अंबड गाव व आसपासच्या परिसरात गुरुवारी (दि. १०) तणाव हाेता.

पोलिसांनी दिलेल्या माहितीनुसार, शब्बीर अहमद खान (रा. अंबड लिंकरोड) व त्यांचा भाऊ सोहेल यांचे भंगार व्यवसायाच्या कमिशनवरून मुन्ना ऊर्फ मोहम्मदसोबत वाद झाले. मुन्ना याने त्याच्या सहकाऱ्यांना बोलावून घेतले. यावेळी आसिफ खान यांनी त्याच्याकडे असलेल्या पिस्तुलातून हवेत गोळीबार केल्याचे फिर्यादी खान यांनी सांगितले. अंबड पोलिसांनी गुलाम बुरअली शेख, सदाम नुरअली शेख, अली हुसेन शेख, रजा नुरअली शेख, साहिल पठाण, मुन्ना ऊर्फ महंमद हासिम खान, आसिफ शेख, मुन्ना शेख यांच्यासह अन्य संशयितांवर अंबड पोलिस ठाण्यात गुन्हा दाखल केला आहे.

दरम्यान घटनेची माहिती समजताच पोलिस आयुक्त जयंत नाईकनवरे, अंबड पोलिस ठाण्याचे वरिष्ठ पोलिस निरीक्षक भगीरथ देशमुख, सहायक निरीक्षक वसंत खतेले, उपनिरीक्षक उत्तम सोनवणे, संदीप पवार यांच्यासह पथक घटनास्थळी पोहोचले. त्यांनी घटनास्थळाची पाहणी केली. या प्रकरणी अंबड पोलिसांनी एका संशयिताला अटक केली असून अन्य फरार संशयितांच्या शोधासाठी पोलिस पथके रवाना करण्यात आले आहेत.