धक्कादायक:शहरातील धोकादायक वाडे पुनर्विकास क्लस्टर‎ योजना कागदावरच; चार वर्षांत एकही प्रस्ताव नाही‎

‎ शहरात आता धोकादायक वाडा पडल्यास मालकांवर‎ सदोष मनुष्यवधाचा गुन्हा दाखल केला जाणार आहे.‎ तसेच, मालक किंवा भाडेकरूंनी धोकादायक वाडे‎ स्वत:हून न उतरविल्यास पोलिस बंदोबस्त लावून‎ मिळकती उतरविण्याबरोबरच त्याचा खर्च‎ संबंधितांकडून वसूल करण्याचा निर्णयही महापालिका‎ आयुक्तांकडून घेण्यात आला आहे. मात्र, दुसरीकडे‎ महापालिका व वाडेमालकांच्या दुर्लक्षामुळे गावठाण‎ भागातील जुन्या पडक्या वाड्यांच्या पुनर्विकासासाठी‎ लागू करण्यात आलेली क्लस्टर योजना कागदावरच‎ राहिल्याचे चित्र आहे. राज्य शासनाने डीसीपीआर‎ म्हणजेच सामायिक बांधकाम नियंत्रण नियमावलीत‎ तरतूद केलेली असताना ही चार वर्षांत एकही प्रस्ताव‎ सादर झालेला नसल्याची धक्कादायक बाब डी. बी.‎ स्टारच्या पाहणीत समोर आली आहे. यावर डी. बी.‎ स्टारने टाकलेला हा प्रकाशझोत....‎

धोकादायक वाड्यांना वर्षानुवर्षे महापालिकेकडून‎ केवळ नोटीस बजावण्याचा सोपस्कार केला जात‎ आहे. त्यामुळे अजूनही धोकादायक वाडे ‘जैसे थे’‎ परिस्थितीत आहेत. शहरातील धोकादायक वाड्यांचा‎ घरांचा प्रश्न अतिशय जटिल झाला असून वर्षभरात‎ शहरात दहाहून अधिक वाडे कोसळण्याची घटना‎ घडलेली आहे. जुने नाशिक, पंचवटी भागात सर्वाधिक‎ जुने वाडे आहेत. दरवर्षी पावसाळ्यात यातील बहुतांश‎ वाडे, घरे कोसळण्याच्या घटना घडत असतात.‎

महापालिकेकडून दरवर्षी नियोजनानुसार नोटीस‎ बजावण्याचा सोपस्कार केला जातो. शहरात एक हजार‎ धोकादायक वाडे व घरे आहे. महापालिकेकडून‎ त्यांच्याबाबतीत कोणत्याही प्रकाराचा ठोस निर्णय‎ घेतला जात नसल्याचे चित्र आहे. त्यामुळे वाडे‎ कोसळण्याच्या घटना घडून जीवितहानी होण्याची‎ दुर्घटना होत आहे. अद्यापही धोकादायक वाडे, घरांचा‎ प्रश्न अधांतरीच आहे. घरमालक आणि भाडेकरू‎ यांच्यातील वादामुळे वाड्यांची दुरुस्तीच होत नाही.‎ तर, दुसरीकडे महापालिका प्रशासनाच्या दुर्लक्षामुळे‎ त्यांची परिस्थिती जैसे थे रहात असून हे वाडे‎ अपघातास निमंत्रण देत आहे. नुकताच‎ अशोकस्तंभावरही धोकादायक वाडा पडल्याची घटना‎ घडली होती.‎

पालिकेच्या अधिकाऱ्यांकडूनच माहिती देण्यास टाळाटाळ‎
गावठाण भागातील जुन्या पडक्या वाड्यांच्या‎ पुनर्विकासासाठी क्लस्टर योजना लागू‎ करण्यात आलेली असून याची‎ अंमलबजावणीची जबाबदारी असलेले शहर‎ अभियंता एस. आर, वंजारी यांच्याशी गुरुवारी‎ डी.बी. स्टारने दिवसभर संपर्क साधण्याचा‎ प्रयत्न केला. मात्र, वंजारी यांच्याकडून‎ प्रतिसाद मिळाला नाही तर इतर‎ अधिकाऱ्यांनीही माहिती देण्यास टाळाटाळ‎ केली.‎

वाडेकऱ्यांना एकत्र‎ करणे शक्य नाही‎
एक एकर क्षेत्रातील सर्व वाडे‎ एकत्र करून त्यांचा विकास‎ करण्याची योजना असली तरी‎ सर्व वाडेकऱ्यांना एकत्र करणे‎ शक्य नसल्याने क्लस्टरसाठी‎ एकही प्रस्ताव आजपर्यंत‎ आलेला नाही. शहरातील‎ धोकादायक घरे आणि वाड्यांना‎ महापालिकेच्या वतीने दरवर्षी‎ नोटिसा दिल्या जात असून या‎ नोटिसांकडे दुर्लक्षच केले जात‎ असल्याचे चित्र आहे.‎

या योजनेची अनेकांना माहितीच नाही‎
पडक्या वाड्यांच्या पुनर्विकासासाठी क्लस्टर योजना लागू करण्यात आलेली‎ आहे. मात्र, महापालिकेकडून या योजनेबाबत कुठल्याही प्रकारची जनजागृती‎ केली जात नाही. केवळ नोटीस देण्याऐवजी महापालिकेकडून योजनेसंदर्भात‎ वाडेमालकांना माहिती दिली तर त्याचा फायदा नक्कीच होईल.‎ - सागर बेदरकर, नागरिक‎

..तर करणार मनुष्यवधाचा‎ गुन्हा दाखल‎
महापालिका आयुक्त डॉ. चंद्रकांत‎ पुलकुंडवार यांनी मालक किंवा‎ भाडेकरूंनी धोकादायक वाडे‎ स्वत:हून न उतरविल्यास पोलिस‎ बंदोबस्त लावून मिळकती‎ उतरविण्याबरोबरच त्याचा खर्च‎ संबंधितांकडून वसूल करण्याचा‎ निर्णय घेतला आहे. तसेच,‎ धोकादायक वाडा पडल्यास‎ मालकांवर सदोष मनुष्यवधाचा‎ गुन्हा दाखल करण्याचा निर्णय‎ घेतला आहे.‎

वाडे कोसळल्याच्या वर्षभरात दहाहून अधिक घटना‎
शहरातील जुने नाशिक, पंचवटी भागासह अशोकस्तंभ,‎ रविवार कारंजा भागात वाडे कोसळण्याच्या वर्षभरात‎ दहावर घटना घडल्या आहेत. जुने नाशिकमधील‎ डिंगरआळी भागात असलेल्या धोकेदायक वाड्यांचे‎ काही भाग वारंवार ढासळत आहेत. जुने नाशिकमधील‎ धोकादायक झालेल्या वाड्यांचा भाग कोसळण्याच्या‎ घटना लागोपाठ सुरूच आहे. सुदैवाने या वाड्यात‎ कोणीही मागील अनेक वर्षांपासून वास्तव्यास नसल्याने‎ अनर्थ टळला. यापूर्वी महापालिका प्रशासनाने‎ आंबाडकर व जोशी वाड्याला धोकादायक म्हणून‎ घोषित करून नोटीसही बजावली होती. या वाड्यांच्या‎ भिंतीचा मोठा भाग काही महिन्यांपूर्वी कोसळला होता.‎