दिव्य मराठी विशेष:नरेडको तर्फे 22 डिसेंबरपासून नाशकात होमथॉन प्रदर्शन

सर्वसामान्यांच्या स्वप्नातील घरकुलाचे स्वप्न साकार करण्यासाठी नॅशनल रिअल इस्टेट डेव्हलपमेंट कौन्सिल (नरेडको) तर्फे २२ ते २५ डिसेंबरपर्यंत सकाळी १० ते रात्री ९ असे चार दिवसांचे होमथॉन प्रदर्शन गंगापूररोडवरील डोंगरे वसतिगृह मैदान येथे आयोजित करण्यात आले आहे. डोम उभारणीच्या कामाचे भूमिपूजन प्रदर्शनाचे मुख्य प्रायोजक दीपक बिल्डर्स अँड डेव्हलपर्सचे चेअरमन दीपक चंदे यांच्या हस्ते विधिवत पूजा करून झाले.

गृहस्वप्न बाळगणाऱ्यांना नाशिक, मुंबईसह नामवंत बांधकाम व्यावसायिकांच्या प्रॉपर्टीज एकाच छताखाली बघण्याची व ती खरेदी करण्याची संधी या प्रदर्शनामुळे उपलब्ध होईल, अशी माहिती नरेडकोचे अध्यक्ष अभय तातेड आणि समन्वयक जयेश ठक्कर यांनी दिली.हे प्रदर्शन चार डोममध्ये उभारण्याचे काम सुरू असून त्यात १०० हून अधिक स्टॉल्स असतील. बांधकाम क्षेत्रासाठी आवश्यक अत्याधुनिक साहित्यांचे स्टॉल्सही येथे असतील. कोणत्याही स्टाॅलवर घर बुक करणाऱ्यास लगेचच नरेडकोतर्फे चांदीचे नाणे भेट देण्यात येणार आहे.

प्रदर्शनास भेट देण्यास येणाऱ्यांचीही नरेडकोतर्फे लकी ड्रॉद्वारे एकास भेट मिळणार असल्याचेही तातेड आणि ठक्कर यांनी सांगितले. सहप्रायोजक म्हणून सिटी लिफ्ट, इन्व्हेरो, केनेस्ट यांचे सहकार्य मिळाले असून घर घेण्यासाठी युनियन बँक ऑफ इंडिया ही नरेडकोची बँकिंग पार्टनर असून एचडीएफसी आयसीआयसीआय, पंजाब नॅशनल बँक आदी बँकांतर्फे कर्जाची सुविधा उपलब्ध करून दिली जाणार आहे.

भूमिपूजनप्रसंगी नरेडकाे नाशिकचे सचिव सुनील गवादे, सहसमन्वयक शंतनू देशपांडे, राजन दर्यानी, मयूर कपाटे, श्रीहर्ष घुगे, अश्विन आव्हाड, युनियन बँकेचे सहायक महाव्यवस्थापक परमजीत सिंग, वास्तुविशारद संजय म्हाळस, भूषण राणे, कुलदीप चावरे, नंदन दीक्षित, भाविक ठक्कर, पुरुषोत्तम देशपांडे, प्रशांत पाटील, अॅड. पी. आर. गीते, देवेंद्र अहिरे, भूषण महाजन, राजेंद्र बागड, नितीन चव्हाण आदी मान्यवर उपस्थित होते.