शैक्षणिक:एमबीबीएस विद्यार्थ्यांना पाचव्यांदा परीक्षेची संधी, राज्यमंत्री डॅा.भारती पवार यांची माहिती

राष्ट्रीय वैद्यकीय आयोगाने २०१९-२० या प्रथम शैक्षणिक वर्षातील एमबीबीएसचे शिक्षण घेणाऱ्या विद्यार्थ्यांना आता पाचव्या वेळेस परीक्षा देण्याची संधी उपलब्ध करून दिल्याची माहिती केंद्रीय आरोग्य आणि कुटुंब कल्याण राज्यमंत्री डॅा.भारती पवार यांनी दिली आहे.

या विद्यार्थ्यांना आधीच्या नियमांनुसार पहिल्या चार प्रयत्नांमध्ये त्यांची पहिली व्यावसायिक एमबीबीएस परीक्षा उत्तीर्ण होणे आवश्यक होते. मात्र २०१९-२० या काळात कोविडकाळात महाराष्ट्रात आणि देशात लॉकडाऊन असल्यामुळे वैद्यकीय महाविद्यालये बंद होती. त्याने एमबीबीएसचे शिक्षण घेणाऱ्या विद्यार्थ्यांना अडचणींचा सामना करावा लागला होता.

त्यामुळे अपेक्षित अभ्यासक्रम पूर्ण होऊ शकला नसल्याने त्यांना पाचव्या वेळेस संधी निर्माण करून द्यावी, अशी मागणी महाराष्ट्रातील विद्यार्थी व पालकांच्या शिष्टमंडळाने केली होती. याअनुषंगाने राष्ट्रीय वैद्यकीय आयोगासोबत चर्चा करण्यात येऊन त्याबाबत राष्ट्रीय वैद्यकीय आयोगाने या विद्यार्थ्यांना पाचव्या वेळेस परीक्षा देण्याची संधी दिली.