‘एमपीएससी’मध्ये योग विषयाला मान्यता द्यावी:नाशिकमधील पहिल्या राज्यस्तरीय योग संमेलनात 12 ठराव

एमपीएससी परीक्षेत योग विषयाला ऐच्छिक म्हणून मान्यता द्यावी तसेच शाळा व महाविद्यालयात योग विषयास मुख्य विषय म्हणून स्थान मिळावे, या मुख्य मागण्यांसह १२ ठरावांना पहिल्या राज्यस्तरीय योग संमेलनात मान्यता देण्यात आली. तसेच या सर्व मागण्या शासन दरबारी मंजूर करण्यासाठी सातत्याने प्रयत्न करणार असल्याचा निर्धारही यावेळी व्यक्त करण्यात आला.

पंचवटी येथील राष्ट्रसंत श्री जनार्दन स्वामी आश्रम येथे योगा फाउंडेशन, महाराष्ट्र संचलित योग शिक्षक संघाच्यावतीने पहिल्या राज्यस्तरीय संमेलनाचा समारोप करण्यात आला. याप्रसंगी महाराष्ट्र योग शिक्षक संघाचे संस्थापक अध्यक्ष डॉ. मनोज निलपवार यांनी १२ ठराव मांडून ते शासन दरबारी मंजूर करण्यासाठी प्रयत्न करणार असल्याचे सांगितले. याप्रसंगी संघाचे उपाध्यक्ष तथा संमेलनाच्या राज्य नियोजन समितीचे अध्यक्ष राहुल येवला, महासचिव अमित मिश्रा, संमेलनाध्यक्ष योगाचार्य अशोक पाटील, स्वागताध्यक्ष डॉ. विशाल जाधव, डॉ. प्रज्ञा पाटील, दिपाली लामधाडे, डॉ. प्रीती त्रिवेदी आदी उपस्थित होते.

याप्रसंगी १२ ठरावांना एकमुखी मान्यता देण्यात आली. त्यामध्ये एमपीएससीसह प्रत्येक जिल्ह्यात आरोग्यवर्धिनीमार्फत योग सत्र आणि योगशिक्षकास नियमित करावे तथा मानध वाढवून द्यावे, शासकीय व निमशासकीय आस्थापनांमध्ये योग ब्रेक नियमित करावा, त्याकरिता एक तज्ज्ञ योगशिक्षक नेमावा, योग विषयाला सेट परीक्षेत सामील करावे, महाराष्ट्र पोलीस खात्यात योगशिक्षक नियमित करावा, जिल्हा सामान्य रुग्णालयात योग थेरफिस्ट जागा भराव्यात, ग्रामीण व शहरी भागातील वीस वर्षांपासून निशुल्क सेवा देणाऱ्या योग शिक्षकास लोक कलावंताप्रमाणे मानधन द्यावे, योग विषयाला पूर्णत: अनुदानित करावे, योग विषयात उच्च शिक्षण घेणाऱ्या विद्यार्थ्यास फेलोशीप प्रदान करावी, मराठी साहित्य संमेलनाप्रमाणे दरवर्षी योग संमेलन शासनाच्या वतीने आयोजित करावे किंवा त्याकरिता संघटनेस अनुदान द्यावे, योगशास्त्रातील पदवीधर व उच्च शिक्षित योग शिक्षकांची नोंदणी करून त्यांना नोंदणी क्रमांक द्यावा आदी ठराव मांडण्यात आले. कार्यक्रमाचे सूत्रसंचालन रवींद्र मालुंजकर यांनी केले. तर दिपाली लामधाडे यांनी आभार मानले.

....

योगासन स्पर्धेचे बक्षीस वितरण

योग फाउंडेशन संचलित महाराष्ट्र योग शिक्षक संघ आणि आदीयोग महाविद्यालय यांच्या सौजन्याने आयोजित ऑनलाईन राज्यस्तरीय योगासन स्पर्धेतील बक्षिसांचे वितरण करण्यात आले. या स्पर्धेसाठी राज्यभरातून एकूण १५५ स्पर्धक नाव नोंदणी केली होती. प्रत्येक गटातून प्रथम द्वितीय आणि तृतीय असे तीन क्रमांक काढण्यात आले. तसेच चतुर्थ व पाचवा क्रमांक यांना उत्तेजनार्थ पारितोषिक देण्यात आले. सर्व विजेत्या स्पर्धकांना मान्यवरांच्या हस्ते स्मृतिचिन्ह व प्रमाणपत्र देण्यात आली. तसेच सर्व विजेत्या स्पर्धकांना योग पुस्तक देण्यात आले.

---