नागरिकांत संताप‎:स्वातंत्र्यवीर सावरकर जलतरण तलावाला‎ अवकळा; लॉकर तुटले, सर्वत्र अस्वच्छता‎च; दुरुस्तीकडे मनपाचा कानाडाेळा

शहरातील महापालिकेच्या जलतरण तलावांवर‎ समस्यांचा डोंगर निर्माण झाल्याचे चित्र डी. बी.‎ स्टारच्या पाहणीत समोर आले आहे.‎ तरणतलावातील काही ठिकाणी लॉकर तुटले‎ आहेत तर काही ठिकाणी जिमच्या साधनांना‎ गंज चढला आहे. जलतरण तलावावर येणाऱ्या‎ नागरिकांनी महापालिकेच्या अधिकाऱ्यांकडे‎ वारंवार तक्रारी केल्या. मात्र, त्याची दखल‎ घेतली जात नसल्याने तलावांची अवकळा‎ कायम आहे.

यावर डी. बी. स्टारने टाकलेला हा‎ प्रकाशझोत. शहरातील महापालिकेच्या स्वातंत्र्यवीर‎ सावरकर जलतरण तलावाने आजतागायत‎ अनेक राष्ट्रीय व आंतरराष्ट्रीय दर्जाचे‎ जलतरणपटू घडवले. मात्र, सध्या या तलावाची‎ अवस्था अत्यंत बिकट झाली असून उन्हाळी‎ प्रशिक्षणासाठी येणाऱ्या जलतरणपटूंना अनेक‎ त्रासाला सामोरे जावे लागत असल्याचे डी. बी.‎ स्टारच्या पाहणीत समोर आले आहे.

याठिकाणी‎ अनेक समस्या अाहेत. महापालिका त्याकडे‎ हेतूपुरस्सर कानाडोळा करीत असल्याची तक्रार‎ नागरिकांकडून डी. बी. स्टारकडे करण्यात‎ आली. या ठिकाणी शहराच्या अनेक भागांतून‎ पोहण्यासाठी नागरिक येतात. मात्र, कर्मचारी वर्ग‎ अपुरा असल्याने हव्या तशा सुविधा नागरिकांना‎ मिळू शकत नाहीत. सध्या सुट्यांचा सीझन‎ आहे.

या काळात दैनंदिन तिकीट काढून‎ येणाऱ्यांची संख्या मोठी आहे. परंतु, तिकीट‎ देणारे कर्मचारी मोजकेच असल्याने लोकांना‎ खिडकीबाहेर ताटकळत बसावे लागत आहे.‎ जलतरण तलावावर पोहणे शिकण्यासाठी‎ अनेक लोक येतात. मात्र, येथे प्रशिक्षकांची‎ संख्या ही कमी आहे. त्यामुळेही अडचणींचा‎ सामना करावा लागत असल्याचे चित्र आहे.‎

जीवरक्षकांची संख्याही अपुरी

सावरकर‎ जलतरण तलावावर जीवरक्षक नसल्याने‎ नागरिकांना आपला जीव धोक्यात घालून पोहावे‎ लागत असल्याचे डी. बी. स्टारच्या पाहणीत‎ समोर आले आहे.‎

फायबरच्या‎ पत्र्यांचीही‎ झाली‎ दुरवस्था‎

शहरातील सावरकर जलतरण तलावाची गेल्या‎ अनेक दिवसांत दुरुस्ती झालेली नाही. या‎ ठिकाणी मध्यंतरी काही समाजकंटकांनी हल्ला‎ केला होता. त्यावेळी येथील साहित्याचे मोठ्या‎ प्रमाणात नुकसान झाले होते. त्याची दुरुस्ती‎ करण्यात आली, मात्र लॉकर अजूनही नादुरुस्त‎ आहेत. तसेच या ठिकाणीही प्रशिक्षकांची‎ कमतरता आहे. तर,जलतरण तलावावर‎ फायबरचे पत्रे टाकण्यात आले आहेत. ते निकृष्ट‎ असल्याने त्याचीही तुटफुट झालेली आहे.‎

दुरवस्थेकडे लक्ष द्यावे‎

जलतरण तलावाच्या दुरावस्थेकडे‎ महापालिकेकडून दुर्लक्ष केले जात‎ आहे.सावरकर जलतरण तलावाच्या‎ शॉवर, लॉकरची दुरुस्ती झालेली‎ नाही. तसेच या ठिकाणी‎ प्रशिक्षकांची ही कमतरता आहे.‎ - अॅड. योगेश मोरे, नागरिक‎

तलावासंदर्भात माहिती घेणार‎

त्र्यंबकरोडवरील स्वातंत्र्यवीर सावरकर‎ जलतरण तलावाच्या तुटफुट आणि‎ समस्यांबाबत माहिती घेतली जाणार असून‎ याबाबत लवकरच कार्यवाही करण्यात केली‎ जाईल.

- नितीन नेर, विभ‍ागीय अधिकारी,‎ पश्चिम विभाग‎

नळांना पाणीच नाही‎

मुख्य जलतरण तलावात अांघोळ‎ करण्यासाठी असलेल्या शॉवरची दुरुस्ती‎ करण्यात आली तरी काही ठिकाणच्या‎ नळांना पाणीच येत नसल्याची तक्रार आहे.‎ काही ठिकाणी बाथरूम, टॉयलेट यांचे‎ दरवाजे तुटलेले आहेत. तसेच, काही‎ कपाटाचे लॉकरही तुटलेले आहे. तसेच,‎ स्वच्छतेबाबत दुर्लक्ष केले जात असल्याने‎ बाथरुममध्ये अस्वच्छता निर्माण झाली आहे.‎

दुरुस्तीचा प्रस्ताव सादर‎
जलतरण तलावाच्या दुरुस्तीचा व‎ कर्मचाऱ्यांचा प्रस्ताव महापालिका‎ आयुक्तांना देण्यात आलेला असून‎ लवकरच दुरुस्तीच्या कामांना‎ सुरुवात होण्याची शक्यता आहे.‎ - रूपचंद काटे, व्यवस्थापक,‎ स्वातंत्र्यवीर सावरकर जलतरण तलाव‎