वर्षभर नवीन कामे नाही:रखडलेल्या कामांमुळे स्मार्ट‎ सीटीला वर्षभराची मुदतवाढ‎, नियोजनशून्य कारभाराचा फटका‎

अधिकाऱ्यांच्या चुकीमुळे रखडलेली व नागरिकांसाठी डोकेदुखी ठरलेल्या स्मार्ट सीटीतील कामांना पूर्ण करण्यासाठी केंद्राच्या नगर विकास मंत्रालयाने पुढील वर्षी जूनपर्यंत अर्थातच एक‎ वर्षाची मुदतवाढ देण्याचा निर्णय घेतला आहे. या मुदतवाढीत नवीन कामे हाती घेता येणार नाहीत.‎ तसेच अतिरिक्त निधी मिळणार नसला तरी‎ प्रलंबित कामे पूर्ण होताना नाशिककरांना मनस्ताप सहन करावा लागणार आहे.‎ पंतप्रधान नरेंद्र मोदी यांनी प्रमुख शहरांचा‎ विकास करण्यासाठी स्मार्ट सीटी ही संकल्पना आणली. त्यात केंद्राकडून ५० टक्के तर राज्य‎ शासन व मनपा हिस्सा प्रत्येकी २५ टक्के असा‎ राहील असेही निश्चित केले. त्यानुसार दुसऱ्या‎ टप्प्यात सन २०१६ मध्ये नाशिकची स्मार्ट सीटीत‎ निवड झाल्यानंतर या कामासाठी नाशिक मुन्सिपल‎ स्मार्ट सिटी डेव्हलपमेंट कार्पोरेशन लिमिटेड (‎ स्मार्ट सिटी) कंपनीची स्थापना करण्यात आली‎ होती. जवळपास दोन हजार कोटीच्या‎ आराखड्यात ५१ प्रकल्पांचा समावेश करण्यात‎ आला. मात्र आरंभापासूनच हा प्रकल्प वादात‎ राहीला. मनसेच्या सत्ताकाळात पुर्ण झालेली‎ महाकवी कालीदास कलामंदिर , पंडीत पलुस्कर हे‎ यापुर्वीच झालेल्या प्रकल्पांना नुतनीकरणाचा‎ मुलामा दिल्यामुळे वाद उदभवला होता.‎

गावठाणात हरीत क्षेत्र विकासासारखी महत्वकांक्षी‎ योजना गुंडाळावी लागली. स्मार्ट सिटी अंतर्गत‎ गावठाण पूर्नविकास योजनेत गरज नसताना‎ धरलेले जवळपास साठहून अधिक रस्ते अपूर्ण‎ आहेत. तसेच तीन जल कुंभाचे काम अपूर्ण आहे.‎ शहरात सीसीटीव्ही बसविणे, गोदावरी घाट‎ सुशोभीकरणाचे काम संथगतीने सुरू आहे.‎ अहिल्याबाई होळकर पुला खाली मेकॅनिकल गेट‎ बसविण्याची कामही र‌खडले आहे. दरम्यान, ऑन‎ स्ट्रीट ऑफ लाईन पार्किंग, होळकर पूल ते‎ आनंदवली दरम्यान प्रवासी जलवाहतूक, गावठाण‎ भागात २४ तास पाणीपुरवठा करण्याच्या योजना‎ पूर्णच झाल्या नाही.‎