आपल्या शहरातील ताज्या बातम्या आणि ई-पेपर मिळवा मोफत

डाउनलोड करा

माेफत विमा, बससेवा देण्याची वारकऱ्यांची मागणी:नाशिकमध्ये उद्या जिल्हास्तरीय वारकरी स्नेहसंमेलनात मांडले जाणार ठराव

नाशिकएका महिन्यापूर्वी
  • कॉपी लिंक

वारकऱ्यांची माेठी संख्या लक्षात घेऊन राज्य सरकारने शासकिय वारकरी महामंडळाची स्थापना करण्यासह वारकऱ्यांना माेफत विमा संरक्षण, प्रत्येक जिल्हयात वारकरी भवन, शासनाने जाहीर केले. पाच हजार रूपयांचे मासिक मानधन वितरीत करण्यासह सर्व पालख्यांना सर्व सुख सुविधा उपलब्ध करून देण्यासारख्या महत्वपूर्ण नऊ विषयांचे ठराव उद्या राज्यातील पहिल्या जिल्हास्तरीय वारकरी संमेलनात नाशिकमध्ये मांडले जाणार आहेत.

राज्यात पहिल्यांदाच, नाशिकमध्ये जिल्हास्तरीय वारकरी स्नेहसंमेलनाचे आयाेजन करण्यात आले असून किमान 5 हजार वारकरी यात सहभागी हाेणार आहेत. पंचवटीतील श्रीराम सार्वजनिक वाचनालय पटांगण, गणेशवाडी येथे हे एक दिवसीय स्नेहसंमेलन हाेणार असून माजी आमदार बाळासाहेब सानप याचे स्वागताध्यक्ष आहेत, उद्या रविवार, 8 जानेवारी राेजी सकाळी 8 वाजता संमेलनाला प्रारंभ हाेणार आहे. केंद्रीय अर्थराज्यमंत्री डाॅ.भागवतराव कराड यांची प्रमुख उपस्थिती असेल तर आमदार श्रीकांत भारतीय हयांच्या उपस्थितीत संमेलनाचा सांगता समाराेह हाेईल.

पहिल्या सत्रात श्री संत तुकाराम महाराज विद्यार्थी गुरूकुल व वृध्दसेवा सदन नाशिकचे हरि किर्तन प्रवक्ते ह. भ.प.गंगाधर महाराज कवडे यांचे मार्गदर्शन हाेईल. दुसऱ्या सत्रात शहरातील वारकरी संप्रदायिक कार्यक्रमातील अडचणी, वारकरी प्रवचन, किर्तनकार, कथाकार यांच्या समस्या व त्यावर शासन दरबारी पाठपूरावा कसा करता येइल? यावर मंथन केले जाणार असल्याची माहीती संमेलनाचे स्वागताेत्सुक ह.भ.प. त्र्यंबकराव गायकवाड, ह.भ.प.पुंडलिकराव थेटे आदींनी दिली.

संमेलनात मांडले जाणारे प्रमुख ठराव असे -

  • शासनाने वारकरी महामंडळाची स्थापना करावी, प्रत्येक जिल्हयात असे महामंडळ असावे.
  • वारकरी वर्षातून पंढरपुर, देहु, आळंदी, पैठण अशा विविध ठिकाणी पायी वारीचा प्रवास महामार्गावरून हाेत असताे हे लक्षात घेऊन माेफत विमा शासनाने द्यावा.
  • नाशिक जिल्ह्यातील वारकऱ्यांसाठी वारकरी भवन सरकारने उभारावे.
  • वारकरी बांधवांसाठी शासनाने जाहीर केलेले पाच हजार रूपयांचे मानधन वितरीत करावे.
  • त्र्यंबकेश्वर ते पंढरपुर तसेच जिल्ह्यातून जाणाऱ्या पालख्यांना सर्व सुख-सुविधा मिळाव्यात
  • वारकरी संप्रदायामध्ये सेवा करणाऱ्या सर्वांना माेफत वैद्यकिय साेयी सुविधा उपलब्ध करून द्याव्यात.
  • वारकरी बांधवांना भजनी साहित्य माेफत उपलब्ध करून द्यावे.
  • वारकऱ्यांना बससेवा माेफत मिळावी.
बातम्या आणखी आहेत...