कारवाईचा बडगा:अनधिकृत हाेर्डिंग लावणाऱ्यांवर आजपासून गुन्हे; पथकाची नजर

शहरात लावलेले अनधिकृत हाेर्डिंग्ज काढण्यासाठी पालिकेने सात दिवसांपूर्वी दिलेल्या जाहीर नाेटिसीची मुदत बुधवारी (दि. १४) संपली असून गुरुवारपासून शहरात अनधिकृत हाेर्डिंग्ज आढळल्यास संबंधितांविराेधात गुन्हा दाखल केला जाणार आहे. त्यासाठी अतिक्रमण विभाग व विभागीय अधिकाऱ्यांचे पथक शहरात फिरणार असून हाेर्डिंग हटवणे व संबंधितांविराेधात गुन्हे दाखल करण्याची जबाबदारीही पथकाचीच असल्याचे उपायुक्त अर्चना तांबे यांनी सांगितले. एवढेच नव्हे तर संबंधित हाेर्डिंग्ज, बॅनर, फलक पालिका जप्त करणार असून त्यासाठी लागणारा खर्चही संबंधितांकडून वसूल केला जाणार आहे.

शहरांमध्ये अनधिकृत होर्डिंग्जमुळे होणाऱ्या विद्रुपीकरणाची समस्या लक्षात घेत उच्च न्यायालयात साताऱ्याच्या सुस्वराज फाउंडेशनच्या वतीने मुंबई उच्च न्यायालयात जनहित याचिका (१५५/२०११) दाखल करण्यात आली होती. नाशिकमधूनही सामाजिक कार्यकर्ते रतन लथ यांनी अनधिकृत होर्डिंग्जविरोधात याचिका दाखल केली होती. या याचिकांवर तब्बल सहा वर्षे चाललेल्या सुनावणीअंती न्यायालयाने ३१ जानेवारी २०१७ रोजी अंतिम आदेश जारी करत अनधिकृत होर्डिंग्ज, फलकांविरोधात कठोर कारवाई करण्याचे निर्देश राज्य शासन तसेच महापालिकांना दिले होते. त्यावेळी नाशकात पहिला गुन्हा तत्कालीन राज्यमंत्री दादा भुसे यांच्या मुलाविराेधातही दाखल केला गेला हाेता.

मात्र पुढे नानाविध कारणांमुळे ही माेहीम बारगळली. अनधिकृत हाेर्डिंग्ज लावणाऱ्यांंविराेधात राज्यातील सत्ताधारी तसेच प्रमुख विराेधी पक्षातील पदाधिकारी असल्यामुळे राजकीय दबाव येऊ लागला. दुसरीकडे, नागरिकांमधून निर्माण झालेला राेष, उच्च न्यायालयाच्या अवमानाची भीती व मुख्य म्हणजे, या सर्वामुळे पालिकेचा डुबणारा महसूल लक्षात घेत आयुक्त डाॅ. चंदक्रांत पुलकुंडवार यांनी नवीन जाहिरात धाेरण जाहीर केले.

त्यानुसार शहरात मनपा व खासगी जागेत हाेर्डिंग्ज लावण्याबाबतची ठिकाणे तसेच त्याचे भाडेही जाहीर केले. आता, या जागांव्यतिरिक्त अन्य ठिकाणी लावली जाणारी हाेर्डिंग्ज व फलक अनधिकृत मानून कारवाई केली जाणार आहे. शहरात सहा विभाग असून प्रत्येक विभागातील विभागीय अधिकाऱ्यांच्या नेतृत्वाखाली सर्वेक्षण हाेईल. सर्व हाेर्डिंग्जची यादी करून त्यानंतर जप्ती केली जाईल व संबधितांविराेधात फाैजदारीही केली जाणार आहे.

हाेर्डिंग्जवर अधिकृत परवानगी, नाव, ठिकाण तसेच क्यूआर काेड हवा
काेणत्याही प्रकारचे फलक लावायचे असेल तर १० बाय १० या जागेची निश्चित केलेल्या ठिकाणांची माहिती घ्या तसेच पालिका संकेतस्थळ www.nmc.gov.in येथे ठिकाणांची यादी प्रसिद्ध करण्यात आली आहे. या जागांव्यतिरिक्त अन्य ठिकाणी हाेर्डिंग्ज लावायचे असेल तर संबंधित विभागीय कार्यालयातील नागरी सुविधा केंद्रांत अधिकृत अर्ज दाखल करून परवाना घ्यावा तसेच हाेर्डिंग्जवर अर्जदाराचे नाव, परवानगी क्रमांक, ठिकाण या माहितीचा क्यूआर काेड प्रदर्शित करणे गरजेचे आहे. तरच ते अधिकृत हाेर्डिंग्ज मानले जाणार आहे.

अशी हाेणार कारवाई
आज गुरुवारपासून मनपा व खासगी जागेत अनधिकृतपणे हाेर्डिंग्ज लावल्याचे आढळले तसेच यापूूर्वी घेतलेल्या परवानगीची मुदत संपल्यानंतरही हाेर्डिंग्ज कायम राहिल्यास उच्च न्यायालयातील जनहित याचिका क्रमांक १५५/२०११ नुसार ३१ जानेवारी २०१७ राेजी काढलेल्या आदेशाच्या संदर्भाने तसेच मुंबई पालिका अधिनियम कलम २४४,२४५ महाराष्ट्र महापालिका जाहिरात प्रसिद्धी व नियमन यानुसार संबंधित हाेर्डिंग्ज जप्त केले जाणार आहे. त्यासाठी येणारा खर्च संबंधितांकडून वसूल केला जाईल तसेच महाराष्ट्र प्रिव्हेंशन आॅफ डिफेन्समेंट आॅफ प्राॅपर्टी अॅक्ट १९९५ नुसार गुन्हा दाखल करण्यात येणार आहे.

पथकामार्फत सर्वेक्षण; गुन्हेही दाखल हाेणार
हाेर्डिंग्ज हटवणे, त्यासाठी झालेला खर्च संबंधितांकडून वसूल करणे व फाैजदारी कारवाई करण्याची नाेटीस दिलेली हाेती. आता मुदत संपली असून आजपासून पथकामार्फत सर्वेक्षण करून फाैजदारी कारवाई केली जाईल. - अर्चना तांबे, उपायुक्त, मनपा