सर्वोत्कृष्ट खेळाचे प्रदर्शन:कॅनोइंग स्पर्धेत पिंपळगाव काॅलेज विजेता

सायखेडा येथे गोदावरी नदीपात्रात पार पडलेल्या आंतर-महाविद्यालयीन कॅनोइंग स्पर्धेत मविप्रच्या पिंपळगाव बसवंत येथील कर्मवीर काकासाहेब वाघ कला विज्ञान आणि वाणिज्य महाविद्यालायाच्या संघातील खेळाडूंनी सर्वोत्कृष्ट खेळाचे प्रदर्शन करीत महाविद्यालयास विजेतेपद मिळवून दिले.

उपविजेतेपद सायखेडा महाविद्यालयास तर तृतीय क्रमांक केटीएचएम महाविद्यालयास मिळाला. कॅनोइंग फोर प्रकारात २०० मीटर अंतराच्या शर्यतीत पहिले सुवर्णपदक पटकाविताना महाविद्यालयाचे खेळाडू धनेश भडांगे, हेमंत हिरे, अरबाज शेख, साद पटेल यांच्या चमूने अंतिम फेरीत विजेतेपद पटकाविले. मुलींच्या विभागात सी फोर २०० मीटर प्रकारात अनुष्का आंबेकर, अश्विनी वाघ, योगिता शेळके व नेहा घुटे यांनी सुवर्णपदक पटकाविले.

या स्पर्धेतील सी फोर १००० मीटर प्रकारात मुलांच्या विभागात प्रथमेश महाले, युवराज जाधव, शुभम हिरे, हेमंत हिरे यांनी विजेतेपद पटकावले. सी टू १००० मीटर अंतराच्या शर्यतीत सायखेडा महाविद्यालयाच्या भाग्यश्री निफाडे व मेघाराणी पवार यांनी विजेतेपद मिळविले. या स्पर्धेतील सर्व विजयी खेळाडूंची सावित्रीबाई फुले पुणे विद्यापीठाच्या आंतरविभागीय स्पर्धेसाठी निवड झाली आहे. या स्पर्धेसाठी विद्यार्थी सहा महिन्यांपासून सराव करत हाेते. अंत्यत चुरशीच्या स्पर्धेत कर्मवीर काकासाहेब वाघ कला, विज्ञान आणि वाणिज्य महाविद्यालायाच्या स्पर्धकांनी उत्कृष्ट खेळाचे प्रदर्शन करत विजेतेपदावर आपले नाव काेरले.

या स्पर्धेतील सर्व यशस्वी खेळाडूंचे मराठा विद्या प्रसारक समाज संस्थेचे अध्यक्ष डॉ. सुनील ढिकले, सरचिटणीस अॅड. नितीन ठाकरे, सभापती बाळासाहेब क्षीरसागर, उपाध्यक्ष विश्वास मोरे, चिटणीस दिलीप दळवी, उपसभापती देवराम मोगल, संचालक मंडळ, शिक्षणाधिकारी डॉ. नितीन जाधव प्रशिक्षक, खेळाडूंनी तसेच विद्यार्थ्यांनी त्यांचे अभिनंदन केले.