आपल्या शहरातील ताज्या बातम्या आणि ई-पेपर मिळवा मोफत

डाउनलोड करा

ताप आल्यास त्वरित करा रक्त तपासणी:पावसाळा पूर्व जिल्ह्यात हिवताप प्रतिरोधसाठी जनजागृती; लक्षणे दिसताच घ्या काळजी

नाशिक11 दिवसांपूर्वी
  • कॉपी लिंक

जिल्हा हिवताप कार्यालय व जि. प. आरोग्य विभागामार्फत जिल्ह्यात जून महिना हिवताप प्रतिरोध महिना म्हणून साजरा करण्यात येत आहे. या अनुषंगाने जिल्ह्यात जनजागृती करण्यासाठी विशेष मोहिम राबविण्यात येत असून नागरीकांनी कुठलाही ताप अंगावर न काढता त्वरीत रक्ताची तपासणी करावी, असे आवाहन जिल्हा हिवताप अधिकारी वैशाली पाटील यांनी केले आहे.

राष्ट्रीय किटकजन्य रोग नियंत्रण कार्यक्रमांतर्गत दरवर्षी पावसाळा सुरू होण्याच्या पार्श्वभूमीवर जून महिना हा हिवताप प्रतिरोध महिना म्हणून साजरा करण्यात येतो. पावसाळ्यात किटकजन्य आजारांमध्ये प्रामुख्याने हिवताप, डेंगी, चिकुनगुन्या, हत्तीरोग या आजारांचा समावेश होतो. हिवताप या आजाराची लागण झाल्यावर थंडी, ताप, अंगदुखी अशा प्रकाराची लक्षणे दिसुन येतात. तसेच डेंगी व चिकुनगुन्या या आजारात ताप, अंगदुखी, डोकेदुखी, अंगावर पुरळ येणे अशा प्रकाराची लक्षणे दिसतात. अशा वेळी रुग्णाला ताप आल्यानंतर त्याकडे दुर्लक्ष न करता त्वरीत रक्ताची तपासणी करुन वेळेत उपचार घेणे आवश्यक आहे. या आजारासाठीच्या शासकीय रूग्णालयात मोफत तपासण्या करण्यात येणार असून रुग्णात लक्षणे असल्याचे आढळल्यास त्यासाठी औषध उपचारही उपलब्ध करून देण्यात येणार आहेत.

उपक्रम राबवून जनजागृती

या मोहिमेंतर्गत जिल्ह्यात जलद ताप सर्वेक्षण, डास उत्पत्ती स्थान शोधुन त्यामध्ये गप्पी मासे टाकणे, आशा कर्मचाऱ्यांच्या मार्फत कार्यक्षेत्रात कामकाज करुन घेणे, हस्तपत्रिका वाटप करणे, मच्छरदाणी वापर करणे साठी लोकांना आरोग्य शिक्षण देणे, गटारी वाहत्या करणे, परीसर स्वच्छता करणे, संडासाच्या व्हेंट पाईपला जाळ्या लावणे, आठवडयातुन एक दिवस कोरडा पाळणे, पाण्याचे साठे झाकुन ठेवणे, वेळोवेळी ग्रामसभा- गटसभा घेवुन लोकांना किटकजन्य आजाराबाबत माहिती देणे आदी उपक्रम राबवून जनजागृती करण्यात येणार आहे.

अशी काळजी घ्यावी

  • आपल्या घरात व आजबाजूला पावसाचे पाणी साचु देवु नये, स्वच्छता ठेवावी.
  • पाणी साठे झाकुन ठेवावे.
  • आठवड्यातुन एक दिव कोरडा पाळावा.
  • भंगार सामान, टायर्स यांची वेळीच विल्हेवाट लावावी.
  • झोपताना मच्छरदाणीचा वापर करावा.
बातम्या आणखी आहेत...