आपल्या शहरातील ताज्या बातम्या आणि ई-पेपर मिळवा मोफत

डाउनलोड करा

अतिक्रमणांकडे मनपाचे दुर्लक्ष:रस्त्यांवरून वाहणारे सांडपाणी, कचऱ्यामुळे मुंबईनाका‎ विद्रुप; गजराविक्रेत्यांच्या अतिक्रमणाने वाढली अस्वच्छता‎

जहीर शेख | नाशिक‎एका महिन्यापूर्वी
  • कॉपी लिंक

सर्वत्र पसरलेली अस्वच्छता, रस्त्यावरून वाहणारे‎ सांडपाणी, अस्ताव्यस्त पडलेले उरलेले अन्न ही बकाल‎ स्थिती आहे मंुबईनाका परिसरातील. मुंबईनाक्यावरील‎ उड्डाणपुलाखाली गजराविक्रेत्यांनी अतिक्रमण करीत‎ संसार थाटले आहेत. या विक्रेत्यांकडून पुलाखालीच‎ आंघोळ, स्वयंपाक केला जाताे. त्यामुळे सांडपाणी थेट‎ रस्त्यावर येत आहे, तसेच भांडी धुतल्यानंतर उरलेले‎ सांडपाणीही रस्त्यावरच टाकले जात असल्याने या‎ परिसरात दुर्गंधी निर्माण हाेत आहे.

या अतिक्रमणाकडे‎ महापालिकेकडून दुर्लक्ष केले जात असल्याने परिसराला‎ बकाल स्वरूप प्राप्त झाले आहे. मुंबईनाका परिसरात‎ गजराविक्रेत्यांचे या अनधिकृत निवासस्थान कधी उठणार‎ असा प्रश्न आता नागरिकांकडून उपस्थित केला जात‎ आहे. या प्रश्नावर डी. बी. स्टारने टाकलेला हा‎ प्रकाशझोत...‎ मुंबईनाका परिसरातील उड्डाणपुलाखाली विविध‎ फुलांची झाडे लावून सुशाेभीकरण करण्यात आले आहे.‎

मायलाॅन कंपनीने येथील सर्कलचे सुशाेभीकरण केले‎ आहे. त्यामुळे या परिसराला आकर्षक स्वरूप प्राप्त झाले‎ आहे. मात्र, गेल्या काही महिन्यांपासून उड्डाणपुलाखालील‎ माेकळ्या जागेत तसेच पदपथांवर गजरा विक्री करणाऱ्या‎ व्यावसायिकांनी अतिक्रमण करून तेथे थेट संसारच‎ थाटले आहेत. तेथेच आंघोळ, स्वयंपाक, झोप आदी गोष्टी‎ होत असल्याने पुलाखाली बकालपणा वाढला आहे.‎ सांडपाणी व सर्वत्र पसरलेल्या कचऱ्यामुळे येथे दुर्गंधी‎ निर्माण हाेत आहे. त्यामुळे वाहतूक बेटाने परिसराच्या‎ सौंदर्यात भर पडलेली असताना दुसरीकडे‎ गजरेविक्रेत्यांच्या अतिक्रमणामुळे त्यास हरताळ फासला‎ जात आहे. गजरेविक्रेत्यांची लहान मुले अनेकवेळा‎ रस्त्याच्या कडेलाच खेळतात. कधी कधी ही लहान मुले‎ दुचाकी आणि चारचाकीच्या पाठीमागे पळत असल्याने‎ अपघात होण्याची शक्यता निर्माण झाली आहे.

‎चोरीच्या व अपघातग्रस्त वाहनांमुळे अडचण :‎ चोरीची वाहने, अपघातग्रस्त वाहनांच्या वाढत्या भंगारमुळे‎ मुंबईनाका पोलिसांना जागेची चणचण भासू लागली आहे.‎ त्यामुळे पाेलिसांकडून पोलिस ठाण्याबाहेर मदिना‎ चौकाकडे जाणाऱ्या रस्त्यावर दुचाकींचे अनधिकृत पार्किंग‎ आहे. वरिष्ठ पोलिस अधिकाऱ्यांसह पोलिस ठाण्याचे‎ गस्तीवरील वाहनेही याच भागात उभी केली जातात.‎ एवढेच नव्हे, तर चक्क अपघातग्रस्त रिक्षाचा सांगाडाही‎ मागील अनेक दिवसांपासून भररस्त्यात वाहतूक‎ बेटाभोवती ठेवण्यात आला आहे.‎

वाहतूक कोंडीतही वाढ‎
अतिक्रमण वाढल्याने मुंबईनाका भागात रोज‎ सायंकाळी प्रचंड वाहतूक कोंडी होत आहे. या‎ ठिकाणी अतिक्रमण वाढल्याने रस्ता अरुंद झालेला‎ आहे. महापालिकेने याकडे गांभीर्याने लक्ष द्यावे.‎ - शोभित मोरे, नागरिक‎

लवकरच अतिक्रमण निर्मूलन मोहीम सुरू होणार‎
अतिक्रमण निर्मूलन मोहिमेंतर्गत मुंबईनाका भागातील‎ ‎ अतिक्रमणावर कारवाई केली जाणार आहे. गडकरी चौक‎ ‎ ते मुंबईनाक्यापर्यंत विशेष मोहीम राबवून सर्व अतिक्रमण‎ ‎ काढण्यात येणार आहे. गजराविक्रेत्यांच्या या अनधिकृत‎ ‎ निवाऱ्यावरही कारवाई केली जाईल. - राजाराम जाधव,‎विभागीय अधिकारी, पूर्व विभाग‎

महापालिकेकडून तक्रारींकडे दुर्लक्ष‎
मुंबईनाका परिसरातील अतिक्रमणासह अनधिकृत पार्किंग व बेशिस्त वाहतुकीचा‎ प्रश्न गंभीर होत चालला असतानाही या प्रश्नाकडे पोलिसांसह महापालिका प्रशासन‎ दुर्लक्ष करत असल्याने समस्यांमध्ये वाढ झाली आहे. मुंबईनाका भागातील‎ अतिक्रमणांबाबत महापालिकेडे तक्रारी करुनही या भागात अतिक्रमण जैसे थेच‎ आहे.

तसेच, द्वारका व मुंबईनाका परिसरातील वाहतूक कोंडी फाेडण्यासाठी‎ पाेलिस प्रशासनाने वाहतूक व्यवस्थेतील बदलाची प्रत्यक्षात अंमलबजावणीच होत‎ नसल्याने वाहतूक कोंडीचा प्रश्न आजही बिकट बनलेला आहे. त्यातच वाहतूक‎ बदलानंतरही तसे कोणतेही सूचनाफलकच या भागात लावले गेले नसल्याने, खुद्द‎ पोलिस प्रशासनालाच याबाबत गांभीर्य नसल्याचे दिसून आले.‎

अतिक्रमणाकडे दुर्लक्ष‎
रुग्णालये, बसस्थानक, टॅक्सी, रिक्षा थांबे,‎ महामार्ग, अंतर्गत रस्ते अशा सर्वच बाबींमुळे‎ मुंबईनाका चौकात वाहतूक कोंडी हाेते. त्यात आता‎ अतिक्रमणांची भर पडली आहे. दुकानदार‎ अनधिकृतरित्या काही फेरीवाल्यांकडून दोन,‎ पाचशे रुपये घेऊन त्यांना दुकानासमोरील रस्त्यावर‎ त्यांचा हातगाडी, दुकान लावण्यास परवानगी देत‎ असल्याचे चित्र आहे. याकडे मात्र‎ महापालिकेकडून दुर्लक्ष केले जात आहे.‎

परिसरात सर्वत्र अस्वच्छता‎
गजराविक्रेत्यांच्या अतिक्रमणामुळे‎ ‎ बकाल स्वरूप प्राप्त झालेले आहे.‎ ‎ विक्रेत्यांकडून या परिसरातच आंघोळ‎ ‎ व स्वयंपाक केला जात असून संपूर्ण‎ ‎ परिसरात अस्वच्छता पसरली आहे.‎ - पप्पू डहाळे, नागरिक‎

विद्रुपीकरणात भर
‎उड्डाणपुलाखाली माेकळ्या जागेत विविध फुलझाडे‎ लावून परिसर सुशाेभीत करण्यात आला आहे. मात्र,‎ काही ठिकाणी माेकळ्या जागेत गजराविक्रेत्यांचे‎ अतिक्रमण झाले आहे. त्यामुळे शहरातील मध्यवर्ती‎ भागात अतिशय विदारक दृश्य बघावयास मिळत‎ आहे. त्यामुळे एकीकडे उड्डाणपुलाखाली शाेभेची‎ झाडे लावून परिसराचे साैंदर्य वाढविण्याचा प्रयत्न‎ केला जात असताना या विक्रेत्यांमुळे परिसर विद्रुप‎ हाेत आहे.‎

बातम्या आणखी आहेत...