उपाययाेजना:मुंबईनाक्यावरील वाहतूक काेंडी‎ फाेडण्यासाठी अंडरपासचा प्रस्ताव‎

मुंबईनाका परिसरातील वाहतूक काेंडी फाेडण्यासाठी‎ दुचाकी, चारचाकी वाहनांसाठी स्वतंत्र दोन अंडरपास‎ तयार करण्याचा प्रस्ताव महापालिकेने रस्ता सुरक्षा‎ समितीच्या बैठकीत सादर केला. याचबराेबर या‎ ठिकाणांहून एस.टी.चीही वाहतूक वळवण्याबाबतचा‎ प्रस्तावी समितीच्या बैठकीत सादर झाला आहे.‎ रस्ता सुरक्षा समितीची त्रैमासिक बैठक पंचवटीतील‎ विभागीय कार्यालयात बुधवारी (दि. १) पालिका‎ आयुक्त डॉ. चंद्रकांत पुलकुंडवार आणि पोलिस‎ आयुक्त अंकुश शिंदे यांच्या उपस्थितीत पार पडली. या‎ बैठकीत शहरातील ब्लॅकस्पाॅट , वाहतूक कोंडी,‎ सिग्नल यंत्रणा अशा विविध मुद्यांवर सखोल चर्चा‎ झाली. मनपा शहर अभियंता शिवकुमार वंजारी यांनी‎ मागील बैठकीचे इतिवृत्त वाचून सुरू असलेल्या‎ कामांची माहिती दिली. तसेच शहरातील वाहतूक‎ काेंडीची समस्या साेडविण्यासाठी पायलट टेस्टिंग‎ म्हणून पोलिस, मनपा व रेजिलियंट इंडिया संयुक्तपणे ‎सिव्हिरिटी इंडेक्स इ-एन्फाेर्समेंट सिस्टिमची‎ पडताळणी करण्यात येणार आहे.

इंदिरानगरजवळील ‎उड्डाणपुलाच्या प्रस्तावित बोगदा विस्ताराच्या कामाला‎ चार महिन्यांत सुरुवात हाेणार असल्याचे यावेळी‎ राष्ट्रीय महामार्ग प्राधिकारणाचे बी. एस. साळुंखे व डी. ‎आर. पाटील यांनी दिली. मनपा अतिरिक्त आयुक्त‎ प्रदीप चौधरी, स्मार्ट सिटीचे सीईओ सुमंत मोरे,‎ प्रादेशिक परीवहन अधिकारी प्रदीप शिंदे, पीडब्लूडीचे‎ अधिक्षक अभियंता प्रशांत सोनवणे, कार्यकारी‎ अभियंता उदय पालवे, रेजिलियंट इंडिया कंपनीचे‎ राजीव चौबे व प्रियंका लखोटे, शासकीय तंत्रनिकेतनचे ‎ ‎ प्रा. रवींद्र सोनोने यांच्यासह विविध विभागांचे प्रमुख ‎यावेळी उपस्थित हाेते‎

३४३ अतिक्रमणांवर बुलडाेजर‎
शहरातील रस्त्यांवरील ३४३ ठिकाणी‎ अनधिकृत बांधकामाबाबत नगर नियोजन‎ विभागाच्या वतीने नोटिसा बजाविण्यात‎ आलेल्या आहेत. याविराेधात अतिक्रमण‎ विभागाकडून कारवाई केली जाणार असून या‎ अतिक्रमणावर लवकरच बुलडाेझर चालविला‎ जाणार आहे. त्याची कारवाई लवकरात लवकर‎ केली जाणार आहे.‎

२६ ब्लॅकस्पाॅटच्या सुधारणेसाठी निविदा‎
शहरातील २६ ब्लॅकस्पाॅटपैकी ६ हे मुंबई-आग्रा‎ राष्ट्रीय महामार्ग, ४ पुणे राष्ट्रीय महामार्ग, ४‎ औरंगाबाद रोड, १ पेठ रोड, १ दिंडोरी रोड, ३‎ त्र्यंबकराेड व ७ मनपा रस्त्यावरील आहेत.‎ त्यामुळे शहरातील २६ ब्लॅकस्पॉट येथे सुधारणा‎ करण्यासाठी दोन दिवसांत मनपाच्या बांधकाम‎ विभागाकडून निविदा काढण्यात येणार‎ असल्याचे यावेळी या बैठकीत सांगण्यात आले.‎

गतिराेधकबाबत ७ तज्ज्ञांची समिती‎
शहरात गतिराेधक बसविण्याबाबतचा‎ निर्णयासाठी तज्ज्ञांची समिती नेमण्याचा निर्णय‎ यावेळी घेण्यात आला. त्यामध्ये मनपा,‎ एनएचएआय, पीडब्ल्यूडी, आरटीओ, पोलिस‎ विभागातील अधिकारी आणि के. के. वाघ‎ इंजिनिअरिंग कॉलेजमधील डॉ. विलास‎ पाटील, शासकीय तंत्रनिकेतनचे प्रा. रवींद्र‎ सोनोने या सर्वांचा समावेश असणार आहे.‎