आपल्या शहरातील ताज्या बातम्या आणि ई-पेपर मिळवा मोफत

डाउनलोड करा

रेमडेसिवीरचा काळाबाजार:फलटणमध्ये रेमडेसिवीरची चढ्या भावाने विक्री करताना दोघांना अटक; तारळे ते फलटण व्हाया सातारा कनेक्शन

साताराएका महिन्यापूर्वी
  • कॉपी लिंक
  • रेमडिसिवीर काळाबाजार करणार्‍यांविरोधात तक्रार करायची असल्यास पोलीस स्टेशनशी संपर्क साधावा - पो.नि. भारत किंद्रे

फलटण येथील सुविधा हॉस्पिटलमधील वार्ड बॉयसह अन्य तीघा जणांना ‘रेमडिसिवीर इंजेक्शन’ची चढ्या भावाने विक्री करत असल्याप्रकरणी अटक केली आहे. चौकशीमध्ये मिळालेल्या माहितीनुसार, या प्रकरणाशी संबंधीत सातारा जिल्ह्यातील आणखी दोघांना औषध प्रशासन विभागाच्या सहकार्याने अटक करण्यात फलटण शहर पोलीसांना यश आले आहे. नव्याने अटक केलेल्या दोघांकडून मिळालेल्या माहितीनुसार तारळे येथील एका मेडिकल दुकानदाराचे व त्याच्या भावाचे नाव पुढे आले असून त्यातील एकाला ताब्यातही घेतलं आहे अशी माहिती फलटण शहर पोलीस ठाण्याचे पोलीस निरीक्षक भारत किंद्रे यांनी दिली. दरम्यान, या प्रकरणात तारळे ( या. पाटण) येथील मेडिकल दुकानदाराचे नाव पुढे येत असल्याने येत्या काळात ‘रेमडिसिवीर’ च्या काळ्या बाजाराचा पर्दाफाश करताना आता हॉस्पिटलसह मेडिकल दुकानदारही पोलीसांच्या रडारवर येणार असल्याचे स्पष्ट होत आहे.

याबाबत सविस्तर माहिती देताना फलटणचे पोलीस निरीक्षक भारत किंद्रे यांनी सांगितले की, दि 9 रोजी फलटण शहरातील सुविधा हॉस्पिटल मधील वार्ड बॉय सुनील विजय कचरे हा 35 हजार रुपये किंमतीने रेमडिसिवीर इंजेक्शनची विक्री करत होता. पोलीस निरीक्षक भारत किंद्रे यांनी सापळा रचून सुनील कचरे व त्याच्या बरोबर असणारा अजय सुरेश फडतरे या दोघांना पकडले होते. त्यानंतर त्यांच्या चौकशीतून प्रवीण मिस्त्री उर्फ प्रवीण दिलीप सापते रा. घाडगेवाडी (ता. फलटण) व निखील घाडगे यांना अटक केली होती. या चौघांकडून कसून चौकशी केल्यानंतर त्यामध्ये सातारा शहरातील अमित विजय कुलकर्णी याने सदरचे रेमडीसीवर इंजेक्शन तारळे, ता.पाटण येथील रविंद्र रामचंद्र लाहोटी याच्याकडून घेतल्याचे उघडकीस आले. त्यानंतर फलटण शहर पोलीसांनी अन्न व औषध प्रशासन विभागाच्या सहाय्याने या दोघांना अटक केली आहे.

सदर प्रकरणी अमित कुलकर्णी व रविंद्र लाहोटी यांच्याकडून चौकशीमध्ये पाटण तालुक्यातील तारळे येथील एका मेडिकल दुकानदाराचे व त्याच्या भावाचे नाव पुढे आले असून फलटण शहर पोलीस पुढील तपास करत आहे. मेडिकल दुकानदाराला चौकशीसाठी ताब्यात घेतले आहे. रेमडिसिवर इंजेक्शनच्या काळाबाजार करणार्‍यांविरोधात कुणाला तक्रार करायची असल्यास त्यांनी तात्काळ फलटण पोलीस स्टेशनशी संपर्क साधावा. तक्रारदाराचे नाव गुप्त ठेवले जाईल असेही आवाहन पोलीस निरीक्षक भारत किंद्रे यांनी केले आहे.

बातम्या आणखी आहेत...