फसवणूक:पूर्णा येथील नागरिकाची ऑनलाइन फसवणूक; लाखोंचा घातला गंडा

पॅनकार्ड अपडेट करणारा संदेश समजून युजर आयडी आणि पासवर्ड टाकल्याने पूर्णा येथील एका नागरिकाला तब्बल पावणेदोन लाख रुपयांना गंडा घातला गेला.

पूर्णा येथील नागरिक शाहीद हुसेन साबेर हुसेन यांचे स्टेट बँक ऑफ इंडियाच्या शाखेत खाते आहे. त्यांना एका अनोळखी मोबाइल क्रमांकावरून संदेश आला. त्यात पॅनकार्ड अपडेट करण्याविषयी माहिती होती. हुसेन यांनी संदेशात असलेल्या लिंकवर क्लिक करून युजर आय डी व पासवर्ड टाकून लॉगीन केले. मात्र त्यांच्या खात्यातून ९१ हजार व ९० हजार अशा दोन वेळेस एकूण १ लाख ८१ हजार रक्कम कमी झाली. हुसेन यांनी तातडीने खात्यावरील व्यवहार बंद केले असता एका अनोळखी मोबाइल क्रमांकावरून कॉल आला की तुमचे केवायसी पूर्ण झाले नसल्याने पुन्हा एकदा पासवर्ड आणि ओटीपी टाका. मात्र हुसेन यांनी समोरच्या व्यक्तीला सांगितले की तू मला फसवले आहेस, माझे पैसे परत पाठव. असे म्हणताच तो मोबाइल क्रमांक बंद झाला. याप्रकरणी हुसेन यांच्या तक्रारीवरून पूर्णा पोलिस ठाण्यात गुन्हा दाखल करण्यात आला. या प्रकरणाचा पुढील तपास सुरू असल्याचे पोलिसांनी सांगितले.

कुपटा येथील नागरिकाची पंधरा लाखांची फसवणूक कुपटा (ता.सेलू) येथील ज्ञानेश्वर प्रकाशराव सोळंके यांची ऑनलाइन पद्धतीने तब्बल पंधरा लाख रुपयांची फसवणूक केल्याची घटना घडली आहे. सोळंके यांना अनोळखी क्रमांकावरून सांगण्यात आले की आपणास २५ लाख रुपयांची केबीसी लॉटरी लागली आहे. यासाठी वेगवेगळ्या क्रमांकांवरून फोन करत विविध प्रोसेससाठी तब्बल १५ लाख रुपये उकळण्यात आले. याप्रकरणी बोरी पोलिस ठाण्यात ३१ ऑक्टोबर रोजी फसवणुकीचा गुन्हा दाखल करण्यात आला.