किशोर आवारे खून प्रकरण:राष्ट्रवादीचे आमदार सुनील शेळकेंसह तिघांवर गुन्हा दाखल; गोळीबार व कोयत्याने केला होता हल्ला

पुणे जिल्ह्यातील तळेगाव दाभाडे येथील किशोर आवारे खून प्रकरणी राष्ट्रवादी काँग्रेसचे आमदार सुनील शेळके, सुधाकर शेळके, संदीप गराडे, शाम निगडकर यांच्यासह अन्य तिघांवर तळेगाव पोलीस ठाण्यात गुन्हा दाखल करण्यात आला आहे. आवारे यांच्या खून प्रकरणाचा कट आमदार शेळके आणि त्यांचा भाऊ यांनी रचला असल्याचा आरोप किशोर आवारे यांचा आई माजी नगराध्यक्षा सुलोचना आवारे यांनी फिर्यादीत केला आहे.

सुलोचना आवारे यांनी दिलेल्या लेखी तक्रारीत सांगण्यात आले आहे की, किशोर हा जनसेवा विकास सेवा समितीचा संस्थापक अध्यक्ष म्हणून तळेगाव दाभाडे येथे सामाजिक काम करत होता. तसेच जनसेवा विकास सेवा आघाडी या पॅनेलमधुन तळेगाव येथे राजकारणात देखील सक्रिय होता. त्यामुळे त्याचे राजकीय विरोधक असलेले आमदार सुनिल शेळके, सुधाकर शेळके ,संदीप गराडे व त्यांचे कार्यकर्ते यांच्यामध्ये नेहमीच खटका उडत असे. गेल्या सहा महिन्यांपासून माझा मुलगा किशोर हा नेहमी मला आमदार सुनिल शेळके, त्याचा भाउ सुधाकर शेळके व संदीप गराडे यांच्यापासून त्याच्या जिवाला धोका असल्याबाबत सांगत असे. तसेच १५ सप्टेंबर २०२२ रोजी माझा ड्रायव्हर प्रविण ओव्हाळ याला सुधाकर शेळके व त्याचा साथीदार यांनी माझे सोबत असल्यामुळे जातिवाचक शिवीगाळ केली होती. तसेच किशोर हा त्याचा मित्र संतोष शेळके याच्या सोबत फिरत असे ही, गोष्ट सुनिल शेळके व सुधाकर शेळके यांना आवडत नसे. कारण सुनिल शेळके यांचे संतोष शेळके सोबत राजकीय वितुष्ट होते व किशोर हा संतोष शेळके यास नेहमी मदत करत असे. म्हणुन सुनिल शेळके व सुधाकर शेळके हे किशोरवर नेहमी चिडुन असे. तरी संतोष शेळके यांनी त्यांच्या विरोधात एन.सी दाखल केली होती. तरी किशोर याने स्वतःचा असा वेगळा गट तयार करून सुनिल शेळके याला गेल्या २ वर्षांपासुन पुर्णपणे राजकीय विरोध केलेला आहे. तसेच किशोर याने वेळोवेळी सुनिल शेळके व त्याचे कार्यकर्ते यांनी केलेल्या चुकीच्या कामाच्या विरोधात वेळोवेळी निदर्शने केली होती. तसेच सोशल मीडियावरही ही बाब टाकली होती. त्याचा राग आरोपी शेळके याच्या मनात होता. तरी, किशोर आवारे याचे राजकीय वर्चस्व निर्माण होवून सुनिल शेळके व सुधाकर शेळके यांच्या राजकीय वर्चस्वाला धोका निर्माण झाला होता. तसेच, माझ्या जिवाचे काही बरे वाईट झाले तर ते याच लोकांपासून होईल हे त्याने मला प्रत्यक्षपणे सांगीतले होते.

गोळीबार व कोयत्याने हल्ला

शुक्रवारी किशोर हा नगरपरिषद तळेगाव दाभाडे येथे दुपारी साडेबारा वाजताच्या सुमारास गेला असताना, तेथे त्याला श्याम निगडकर व त्याचे अनोळखी ३ आरोपी साथीदारानी बंदुकीच्या गोळया झाडुन व कोयत्यासारख्या धारदार शस्त्राने गंभीर वार करून जखमी केले व ठार मारले आहे.