फसवणूक:सव्वा कोटी रुपयांचे सोने घेऊन कारागीर पसार

गुरुवार पेठेतील एका सराफी पेढीतील सव्वा कोटी रुपयांचे दागिने घेऊन कारागीर पसार झाल्याची घटना उघडकीस आली आहे. या प्रकरणी कारागिराविरुद्ध खडक पोलिस ठाण्यात गुन्हा दाखल करण्यात आला. प्रशांत सुनील सासमल (४०, रा. गणेश पेठ) असे आराेपी कारागिराचे नाव आहे. याबाबत सिद्धेश ज्वेलर्सचे मालक कीर्ती चंदुलाल ओसवाल यांनी फिर्याद दिली आहे. आराेपी सासमल काही ‌वर्षांपासून गुरुवार पेठ, रविवार पेठेतील सराफ व्यावसायिकांचे दागिने घडवून देत आहे. त्यामुळे सराफ व्यावसायिकांचा त्याच्यावर विश्वास होता. कीर्ती ओसवाल यांनी त्याच्याकडे एक कोटी सात लाख ५३ हजारांचे सोने तसेच मनोज ओसवाल यांनी १८ लाख ५४ हजारांचे सोने त्याला दागिने घडवण्यासाठी दिले होते. एक ते दीड महिन्यांपूर्वी त्याने सराफी व्यावसायिकांकडून सोने घेतले. त्यानंतर तो पसार झाला. फसवणूक झाल्याचे उघडकीस आल्यानंतर सराफ व्यावसायिक कीर्ती ओसवाल आणि मनाेज ओसवाल यांनी पोलिस ठाण्यात धाव घेऊन तक्रार नोंदवली.