पोटनिवडणुकीसाठी भाजपचे उमेदवार जाहीर:पुण्यातल्या कसबा येथून हेमंत रासने, तर चिंचवडमधून अश्विनी जगताप यांना उमेदवारी

बहुचर्चित ठरणाऱ्या कसबा पेठ आणि चिंचवड पोटनिवडणुकीसाठी भाजपने शनिवारी सकाळी उमेदवार जाहीर केले. कसबा पेठ येथून अपेक्षेप्रमाणे हेमंत रासने यांना तिकीट देण्यात आले, तर चिंचवडमध्ये लक्ष्मण जगताप यांच्या पत्नी अश्विनी जगताप यांना उमेदवारी जाहीर करण्यात आली.

अशी होणार लढत

कसबा पेठ मतदार संघातून मुक्ता टिळक या आमदार होत्या. मात्र, कर्करोगाशी झुंजताना त्यांचे निधन झाले. तर चिंचवडमधली जागा लक्ष्मण जगताप यांच्या निधनाने रिक्त झाली होती. आता या दोन्ही जागेवर भाजपने उमेदवार दिले आहेत. कसबा पेठमधून हेमंत रासने यांना तिकीट देण्यात आले आहे. तर चिंचवडमधून भाजपने लक्ष्मण जगताप यांच्या पत्नी अश्विनी जगताप यांना उमेदवारी दिली आहे.

'ते' मविआचे उमेदवार नाहीत

चिंचवडमध्ये महाविकास आघाडीकडून राष्ट्रवादी काँग्रेसचे राहुल कलाटे यांना तर कसबा पेठमधून काँग्रेसच्या रवींद्र धंगेकर यांना तिकीट देण्यात आल्याची चर्चा होती. मात्र, काँग्रेस प्रदेशाध्यक्ष नाना पटोले यांनी अजून उमेदवार जाहीर केले नसल्याचे सांगितले. त्यामुळे महाविकास आघाडीकडून कोणाला तिकीट मिळणार याची उत्सुकता आहे.

पाटील म्हणाले, वाद नाही

कसबा पेठ आणि चिंचवड पोटनिवडणुकीसाठी उमेदवार जाहीर केल्यानंतर मंत्री चंद्रकांत पाटील यांनी माध्यमांशी संवाद साधला. ते म्हणाले की, जगताप कुटुंबात कसलाही वाद नाही. काल टिळक कुटुंबीयांशीही चर्चा करण्यात आली. त्यानंतर हा निर्णय घेण्यात आला आहे. उमेदवारी न दिल्यामुळे टिळक कुटंब नाराज नाही, असे स्पष्टीकरणही त्यांनी दिले. त्यामुळे टिळक आणि जगताप कुटुंबामध्ये यावरून धुसफूस सुरू होती का, अशी चर्चा सुरू झाली आहे.

राऊत म्हणाले, मतभेद नाहीत

पोटनिवडणुकीत महाविकास आघाडीत कोणतेही मतभेद नाहीत. आम्ही कसबा आणि चिंचवडची निवडणूक एकत्र लढणार आहेत, अशी माहिती खासदार संजय राऊत यांनी दिली. दरम्यान, नुकत्याच विधान परिषदेच्या शिक्षक आणि पदवीधर मतदार संघाच्या निवडणुका झाल्या. त्यात भाजपला केवळ एक जागा मिळाली. तर महाविकास आघाडीच्या खात्यात तीन जागा गेल्या. एका जागेवर अपक्ष उमेदवार निवडून आला. आता या निवडणुकीत काय होणार याची उत्सुकता शिगेला आहे.

मंगळवारपर्यंत अर्ज स्वीकारणार

पुणे जिल्ह्यात 205 - चिंचवड आणि 215 - कसबा पेठ विधानसभा मतदारसंघाच्या पोटनिवडणुकीचा कार्यक्रम प्रशासनाने सुरू केला आहे. त्यानुसार मंगळवार, 7 फेब्रुवारी 2023 पर्यंत नामनिर्देशपत्रे स्वीकारण्यात येणार आहेत. तर या ठिकाणी 26 फेब्रुवारी रोजी मतदान होणार आहे. त्यासाठी प्रशासनाने तयारी सुरू केली आहे. मात्र, उमेदवारी दाखल करायच्या शेवटच्या दिवसापर्यंत काय होणार, याची उत्सुकता आहे. या ठिकाणी अनेक जण इच्छुक होते. त्यामुळे कोणी बंडखोरी करणार का, हे पाहावे लागेल.

संबंधित वृत्त

पुण्यातील विधानसभेची पोटनिवडणूक:चिंचवड मतदारसंघासाठी 510 तर कसबा पेठ मतदारसंघासाठी 270 मतदान केंद्रे

भाजपचे उमेदवार आज रात्री घोषित होणार:चंद्रकांत पाटील यांची माहिती; कसबा, चिंचवडच्या इच्छुकांची नावे दिल्लीकडे पाठवली