पालकमंत्र्यांनी घेतली बिरेंद्र सराफ यांची भेट:भिडे वाड्यासाठी शासनाची भूमिका न्यायालयात प्रभावीपणे मांडावी - चंद्रकांत पाटील

पुण्यातील भिडे वाड्याचे महाराष्ट्रासाठी ऐतिहासिक महत्त्व आहे. त्यामुळे या वाड्याचा राष्ट्रीय स्मारकाच्या रुपात विकास होण्यासाठी शासन कटिबद्ध आहे. मात्र, तसेच स्मारकाचा वाद उच्च न्यायालयात सुरू असल्याने त्याठिकाणी शासनाची भूमिका प्रभावीपणे मांडावी अशी विनंती पालकमंत्री चंद्रकांत पाटील यांनी शुक्रवारी राज्याच्या महाधिवक्त्यांना केली.

काय म्हणाले पाटील?

पालकमंत्री पाटील यांनी शुक्रवारी पुण्यातील भिडे वाड्यासंदर्भातील न्यायालयीन प्रकरणाबाबत राज्याचे महाधिवक्ता बिरेंद्र सराफ यांची मुंबईत भेट घेऊन, सविस्तर चर्चा केली. तसेच शासनाच्या भूमिकेसंदर्भात महाधिवक्त्यांना अवगत केले. पुण्यातील भिडे वाडा येथे क्रांतिज्योती सावित्रीबाई फुले यांनी मुलींसाठी पहिली शाळा सुरू केली. ही वास्तू अनेक महिला भगिनींसाठी प्रेरणास्थान आहे. येणाऱ्या पिढीनेदेखील इथून सामाजिक कार्याची आणि शिक्षणाची प्रेरणा घ्यावी यासाठी या वाड्याचा राष्ट्रीय स्मारक म्हणून विकास करण्याचा शासनाचा प्रयत्न आहेत. मात्र, सदर जागेचे दोन मालक न्यायालयात गेले असल्याने सध्या हे प्रकरण उच्च न्यायालयात प्रलंबित आहे.

या प्रकरणाची सुनावणी जलदगतीने होऊन, शासनाच्या बाजूने निकाल लागावा, असे शासनाचे प्रयत्न आहेत. त्यासाठी राज्याच्या महाधिवक्त्यांनी सदर प्रकरणाचे गांभीर्य लक्षात घेऊन स्मारकासाठीची शासनाची भूमिका प्रभावीपणे मांडावी, अशी विनंती पालकमंत्र्यांनी या भेटी दरम्यान केली आहे.

भिडे वाडा सध्या दुरवस्थेत

पुण्यातील श्रीमंत दगडूशेठ हलवाई गणपती मंदिर समोर भिडे वाडा वसलेला आहे. सावित्रीबाई फुले यांनी या वाड्या मध्ये देशातील पहिली मुलींची पहिली शाळा सुरू केली. परंतु सध्या हा वाडा भग्न अवस्थेत असून सर्व वाड्याची दुरवस्था झालेली आहे.