तोतया:खोटे ओळखपत्र दाखवित अरेरावी करणाऱ्या तोतया पोलिसाला अटक; पुणे पोलिसांची धडक कारवाई

कारला काळ्या काचा लावून भरधाव वेगात जात असलेल्या एका कारला वाहतूक पोलिसांनी चौकशीसाठी थांबवले. त्यानंतर संबंधित वाहनचालकांकडे तपासणी करत असताना, सदर व्यक्तीने आपण पोलिस अधिकारी असल्याचे सांगत ओळखपत्र दाखवले आणि अरेरावी करण्याचा प्रयत्न केला. मात्र, पोलिसांचा हजरजबाबीपणा आणि सजगतेने संबंधित व्यक्तीचे वाढलेले केस, दाढी, पेहराव आणि बोलण्याचा रुबाब यावरून तो पोलिस नसल्याचे स्पष्ट झाले आणि पोलिसांनी त्यास गजाआड केले आहे.

ओमकार विलास धर्माधिकारी (मु.अनपटवाडी,ता.कोरेगाव,जि.सातारा) असे त्याचे नाव आहे. त्याच्याकडून सातारा पोलिस दलाचे बनावट ओळखपत्र जप्त करण्यात आले आहे याबाबत पोलिस कर्मचारी सागर पाडळे यांनी विश्रामबाग पोलिस ठाण्यात फिर्याद दिली आहे.

पोलिसांनी दिलेल्या माहितीनुसार, मंगळवारी तक्रारदार सागर पाडळे हे त्यांच्या इतर सहकार्‍यांसोबत टिळक चौकात वाहतूक नियत्रंण कर्तव्यावर होते. रात्री साडे आठ ते पावने नऊ वाजताच्या सुमारास काळ्या काचा असलेली कार त्यांना टिळक रस्ते कडून केकर रस्त्याकडे जाताना दिसली. त्यामुळे त्यांनी त्याला थांबविले. त्यावेळी त्याने आपले नाव ओमकार व्हि धर्माधिकारी असून, तो पोलिस असल्याची बतावणी केली. माझ्यावर कारवाई करू नका तुम्हाला महागात जाईल असा दम वाहतूक पोलिसांना भरला. त्याच्या बोलण्यावरून पाडळे यांना आरोपी बाबत संशय आला.

त्यांनी ओळखपत्राची मागणी केली. त्यावेळी त्याचे ओळखपत्र बनावट असल्याचे निदर्शनास आले. त्याच्या पदाबाबत विचारले असता, तो उडवाउडवीची उत्तरे देऊ लागला. त्याची सहायक पोलिस निरीक्षक देवकर यांनी चौकशी केली. त्यावेळी त्याने तो पोलिस नसून, मित्राचे पोलिस ओळखपत्र पाहून त्याने बनावट तयार केल्याची कबुली दिली. पुढील कारवाईसाठी विश्रामबाग पोलिसांच्या ताब्यात आरोपीस देण्यात आले आहे.