भाईगिरीच्या वर्चस्व वादातून तरुणावर जीवघेणा हल्ला:पूर्ववैमनस्यातून हल्ला करणाऱ्या दोघांना पोलिसांकडून अटक

भाईगिरीच्या वर्चस्व जुन्या वादातून टोळक्याने तरुणावर जीवघेणा हल्ला करीत त्यास बेदम मारहाण केली.या घटनेत अक्षय प्रमोद कदम (वय 27, रा. कतारवाडी, येरवडा) हा तरुण जखमी झाला आहे अशी माहिती पोलिसांनी मंगळवारी दिली आहे.

सदरची घटना पाच मार्चला रात्री सव्वाअकरा वाजण्याच्या सुमारास येरवडा परिसरात घडली आहे. याप्रकरणी दोघा सराईत आरोपीना अटक करण्यात आली आहे.आमन अमरदीप भानू (वय 23, रा. येरवडा, पुणे) आणि आकाश पवार (वय 27 रा. कतारवाडी,पुणे) अशी अटक केलेल्या आरोपीची नावे आहेत. नीतेश सदभैय्या, आकाशा पानबोने , राजेश सदभैय्या अशी गुन्हा दाखल झालेल्या इतर आरोपीची नावे आहेत.

पोलिसांनी दिलेल्या माहितीनुसार, अक्षय कदम हा पाच मार्चला रात्री अकराच्या सुमारास मित्रांना भेटून घरी चालला होता. त्यावेळी गॅरेज परिसरात त्याच्या ओळखीचे आमन आणि इतर साथीदार थांबले होते. त्यावेळी भाईगिरीच्या जुन्या वादातून आमनने अक्षयला शिवीगाळ करीत हातातील लोखंडी कड्याने डोक्यात मारहाण केली. इतर साथीदारांनी अक्षयला लाथाबुक्क्यांनी मारहाण केली. त्यानंतर आरोपी नीतेशने आम्ही इथले भाई आहोत, आमच्या नादी कोणी लागला तर तोडून फोडून टाकतो. आमच्या मध्ये कोणी यायचे नाही, असे म्हणत दहशत निर्माण केली आहे. याप्रकरणी सहायक पोलीस निरीक्षक महानोर पुढील तपास करीत आहेत.

पार्किंगच्या वादातून दोघा तरुणांना बेदम मारहाण

आइस्क्रीम खात असताना आपल्या जागेत मोटार पार्किंग केल्याच्या रागातून टोळक्याने दोघा तरुणांवर जीवघेणा हल्ला करीत त्यांना बेदम मारहाण केली. ही घटना पाच मार्चला रात्री साडेदहाच्या सुमारास मांजरी बुद्रूकमधील भंडलकरनगर कमानीजवळ घडली आहे. संग्राम हरपळे आणि विक्रांत साळुंखे ( रा.पुणे)अशी जखमी झालेल्यांची नावे आहेत अशी माहिती पोलिसांनी मंगळवारी दिली आहे.

पोलिसांनी दिलेल्या माहितीनुसार, फिर्यादी संग्राम हे मित्रासह आइस्क्रीम खाण्यासाठी भंडलकरनगर कमानीजवळ गेले होते. त्यावेळी त्यांनी मोटार परिसरात पार्किंग केली. त्याचा राग आल्यामुळे परिसरातील एकाने टोळक्याच्या मदतीने दोघांना बेदम मारहाण केली. संग्राम यांच्यावर शस्त्राने वार करुन गंभीररित्या जखमी केले. त्यानंतर टोळक्याने विक्रांतला बेदम मारहाण करीत दुखापत केली. याप्रकरणी सहायक पोलीस निरीक्षक नानासाहेब जाधव पुढील तपास करीत आहेत.