ग्वाही:शनिवार वाडा परिसरातील जुन्या वाड्यांसाठी पुरातत्व विभागाकडे पाठपुरावा करू - पालकमंत्री चंद्रकांत पाटील

पुण्यातील शनिवार वाडा परिसरातील जुन्या वाड्यांचे पुनर्निर्माण करण्यास अनेक अडथळे आहेत. त्यामुळे इथल्या नागरिकांना अनेक अडचणींचा सामना करावा लागत असल्याने, स्थानिक नागरिकांच्या सहकार्याने पुरातत्व विभागाकडे पाठपुरावा करुन मार्ग काढू, अशी ग्वाही पालकमंत्री चंद्रकांत पाटील यांनी सोमवारी दिली.

पुण्यातील ऐतिहासिक वारसा असलेल्या वास्तूंच्या 100 मिटर परिसरातील बांधकामांना आणि दुरुस्तीला पुरातत्व विभागाकडून बंदी घालण्यात आली आहे. त्यामुळे सदर परिसरातील अनेक बांधकामे धोकादायक परिस्थितीत आहेत. हा प्रश्न सोडविण्यासाठी पालकमंत्री चंद्रकांत पाटील यांनी सोमवारी स्थानिकांची भेट घेऊन जुन्या वाड्यांची पाहाणी केली.

पालकमंत्री पाटील म्हणाले की, पुरातत्व विभागाच्या परिपत्रकामुळे पुण्याचा मध्यभाग असलेल्या शनिवार वाड्याच्या शंभर मिटर परिसरात नव्याने बांधकाम किंवा दुरुस्ती करता येत नाही. शहरातील अन्य ठिकाणीदेखील अशी समस्या येत आहे. याबाबत राज्य शासनाची भूमिका सकारात्मक आहे. मात्र याबाबतचे पुरातत्व विभागाशी संबंधित प्रकरण सर्वोच्च न्यायालयाकडे प्रलंबित असल्याने त्याबाबतची माहिती घेऊन बांधकामांना स्थगिती नसल्यास पुरातत्व विभागाकडे याबाबत पाठपुरावा करण्यात येईल, त्यासाठी स्थानिकांना सोबत घेऊन दिल्लीत पुरातत्व विभागाच्या अधिकाऱ्यांसोबत बैठक घेऊ, असेही त्यांनी यावेळी सांगितले.

बांधकामाचा प्रश्न प्रलंबित

चंद्रकांत पाटील यावेळी म्हणाले, ऐतिहासिक ठिकाणी जवळच बहुमजली बांधकाम करता येणार नाही असे पत्र पुरातत्व खात्याने काढलेले आहे.त्यामुळे पुण्यात पाच ठिकाणी तर देशभरात साडेतीनशे ठिकाणी बांधकामाचा प्रश्न निर्माण झाला आहे. सर्वोच्च न्यायालयात याबाबत मागील वीस वर्षापासून केस प्रलंबित असून त्याबाबत अध्याप निर्णय झालेला नाही. एखाद्या परिपत्रकाने अशाप्रकारे बांधकामांना स्थितीत दिली जात असेल तर त्या अनुषंगाने पुरातत्त्व खात्या सोबत दिल्लीमध्ये बैठक घेऊन सकारात्मक चर्चा करता येऊ शकेल.