'हर हर महादेव'चा शो पुण्यात सुरू:मनसेने प्रेक्षकांना संरक्षण पुरवण्याची घेतली जबाबदारी

'हर हर महादेव' चित्रपटास विरोध करत राष्ट्रवादी काँग्रेसने हिंसक आंदोलन केल्यानंतर महाराष्ट्र नवनिर्माण सेनेचे कार्यकर्ते आक्रमक झाले आहे. पुण्यातील कोथरूड परिसरात सिटी प्राइड या चित्रपटगृहात पुण्यातील मनसेचे पदाधिकारी आणि कार्यकर्ते एकत्रित येत बुधवारी त्यांनी सदर चित्रपटाचा शो सुरू केला. यावेळी कोणताही अनुचित प्रकार घडू नये म्हणून पोलिसांनी मोठा बंदोबस्त चित्रपट गृहाच्या परिसरात ठेवला.

महाराष्ट्र नवनिर्माण सेनेने ' हर हर महादेव ' चित्रपटाचे समर्थन केले असून त्याबाबत सक्रिय पाठिंबा देण्यासाठी पुण्यातील मनसे कार्यकर्ते आक्रमक झाल्याचे बुधवारी पाहावयास मिळाले. ' छत्रपती शिवाजी महाराज की जय ', ' राज ठाकरे जिंदाबाद ' अशा घोषणा देत मनसे कार्यकर्त्यांनी पक्षाचे झेंडे सिटी प्राइड चित्रपट गृहात फडकवले.

मनसे नेते बाबू वागस्कर आणि पुणे शहराध्यक्ष साईनाथ बाबर म्हणाले, राज ठाकरे यांना चित्रपट भूमिकेवरून विरोध कोण करत असेल तर ते आम्ही सहन करणार नाही. पुण्यात ११ ठिकाणी या चित्रपटाचे शो सुरू आहे त्याजागी आम्ही संरक्षण देणार आहे. लोक उत्सुकतेने हा चितपट पाहण्यास येतील. ज्यांचा चित्रपटास विरोध आहे त्यांनी चित्रपट पहावा आणि त्याबाबत काही आक्षेप असतील तर सेन्सॉर बोर्डकडे त्याबाबत तक्रार द्यावी.

अजय शिंदे म्हणाले, छत्रपती शिवाजी महाराज यांच्याबाबतचा कोणी चित्रपट बंद पडण्याचा प्रयत्न करत असेल तर मनसे सैनिक रस्त्यावर उतरून या विरोधात आंदोलन यापुढे करणार आहे. मनसे प्रमुख राज ठाकरे यांना विरोध करण्यासाठी चित्रपट बंद पाडण्याचा प्रयत्न राष्ट्रवादी काँग्रेसकडून जाणीवपूर्वक केला जात आहे. चित्रपट पाहण्यासाठी येणाऱ्या नागरिकांनी कोणाला घाबरु नये.प्रेक्षकांना कोणी चित्रपट गृहात मारहाण करत असे तर त्यांचे हात तोडण्याची धमक मनसे कार्यकर्त्यांना मध्ये आहे. प्रेक्षक जबाबदारी आम्ही घेतो आहे.