पुण्यात गोळीबार करून 28 लाखांची रोकड लुटली:मार्केटयार्ड परिसरात 5 ते 6 जणांकडून दिवसाढवळ्या दरोडा; पोलिसांसमोर आव्हान

पुण्यातील मार्कटयार्ड परिसरात मास्क लावून आलेल्या पाच ते सहा आराेपींनी गाेळीबार करत व्यापाऱ्यांची 28 लाख रुपयांची राेकड जबरदस्तीने पळवून नेल्याचा प्रकार शनिवारी दुपारी घडला आहे. अंगडिया ऑफिसमधून सदर आराेपींनी संबंधित राेकड पळवून नेताना त्यांच्या जवळील पिस्टलमधून एक राऊंड फायर केल्याने खळबळ उडाली. दरम्यान या घटनेची माहिती मिळताच, मार्केटयार्ड पाेलिस घटनास्थळी दाखल झाले असून पाेलिसांनी आराेपींचा शाेध सुरू केला आहे.

गुटखा विक्रीसाठी घेऊन जाणाऱ्या दोन गाड्यावर पोलिसांकडून कारवाई, 18 लाखांचा मुद्देमाल जप्त पुणे शहरात गुटखा घेऊन येत असलेल्या दोन गाड्या गुन्हे शाखेच्या खंडणी विरोधी पथक एकने पकडून गुटख्यासह 18 लाख रुपयांचा मुद्देमाल जप्त केला आहे. संजय हनुमंत ओरसे (वय 35, रा. जनवाडी, पुणे) आणि विनोद जयवंत ढोले (वय 39, रा. जनवाडी, पुणे) यांच्याविरुद्ध शिवाजीनगर पोलिस ठाण्यात गुन्हा दाखल करण्यात आला आहे.

पोलिसांनी दिलेल्या माहितीनुसार, खंडणी विरोधी पथक एक कडील अधिकारी व अंमलदार हे पेट्रोलिंग करत असताना शिवाजीनगर न्यायालयाच्या मागील बाजूस दोन गाड्या थांबल्या असून त्यात बंदी असलेला गुटखा असल्याची माहिती मिळाली. पोलिस पथकाने ईरटीका व व्हॅगनार या गाड्या ताब्यात घेऊन तपासणी केली. त्यात केशरयुक्त विमल पान मसाला, तंबाखू, असा 5 लाख 4 हजार रुपयांचा सुगंधी गुटखा/तंबाखू व या गाड्या असा 18 लाख 4 हजार रुपयांचा मुद्देमाल जप्त केला. ही कारवाई पोलिस आयुक्त अमिताभ गुप्ता, अपर पोलिस आयुक्त गुन्हे रामनाथ पोकळे , पोलिस उपायुक्त गुन्हे श्रीनिवास घाडगे , सहायक पोलिस आयुक्त गुन्हे एक गजानन टोम्पे यांच्या मार्गदर्शनाखाली खंडणी विरोधी पथक एकचे पोलिसनिरीक्षक अजय वाघमारे, सहायक पोलिसनिरीक्षक अभिजीत पाटील, पोलिसउप निरीक्षक विकास जाधव,पोलिस अंमलदार संजय भापकर, प्रविण ढमाळ, नितीन कांबळे, दुर्योधन गुरव, विजय कांबळे, प्रफुल्ल चव्हाण यांच्या पथकाने केली आहे.