कारवाई:पोलिस आयुक्तांकडून सराईत गुंड अभिषेक जाधवसह टोळीवर मोक्का

पुणे शहरातील वाढती गुन्हेगारी संपुष्टात आणण्यासाठी आणि कायदा सुव्यवस्था मजबूत करण्यासाठी पुणे पोलिस आयुक्त रितेश कुमार यांच्याकडून सराईता गुन्हेगार विरुद्ध मोक्का कारवाईचा बडगा उगारण्यात येत आहे. अलंकार पोलिस ठाण्याच्या हद्दीत दहशत माजविणार्‍या सराईत गुन्हेगार अभिषेक जाधवसह टोळीविरुद्ध मोक्कानुसार कारवाई करण्यात आली आहे. पोलिस आयुक्त रितेश कुमार यांनी मोक्कानुसार केलेली ही 20 वी कारवाई आहे अशी माहिती पोलिसांनी सोमवारी दिली आहे.

अभिषेक रोहिदास जाधव (वय-23 रा. एरंडवणे), (टोळी प्रमुख) तन्मय तानाजी इटकर ( वय 19 रा नर्‍हे रस्ता), ईश्वर खंडूलाल चव्हाण (वय 18 रा. डहाणूकर कॉलनी, कोथरूड ),सुजल संजय कदम (वय 18 रा. गोसावी वस्ती, नवीन शिवणे, कर्वेनगर )आणि पियुष सतीश जाधव ( वय 20 रा. वारजे) अशी मोक्कानुसार कारवाई केलेल्या आरोपीची नावे आहेत.

सराईत गुन्हेगार अभिषेक जाधव टोळीने 23 फेबु्रवारीला नंदु अनंता जाधव (वय - 22 ) याचा पाठलाग करुन धारदार हत्याराने त्याच्यावर वार करुन त्याचा निर्घृण खून केला होता. आरोपी अभिषेक जाधव याने खूनासाठी नवीन साथीदार सोबत घेवुन संघटीत टोळी तयार केली. अवैध्य मार्गाने आर्थिक फायदा मिळविण्याचे उद्देशाने हिंसाचाराचा वापर करीत खून, खुनाचा प्रयत्न, अपहरणासारखे गंभीर गुन्हे वेळोवेळी केले.

त्यामुळे अलंकार पोलिस ठाण्याचे वरिष्ठ पोलिस निरीक्षक राजेंद्र सहाणे यांनी जाधव टोळीविरुद्ध मोक्का प्रस्ताव तयार केला. अपर पोलिस आयुक्त राजेंद्र डहाळे यांना सादर केला. पोलिस आयुक्त रितेश कुमार यांनी टोळीविरुद्ध मोक्का कारवाई केली. गुन्ह्याचा तपास एसीपी राजेंद्र गलांडे करीत आहेत. ही कामगिरी पोलिस आयुक्त रितेश कुमार, सहआयुक्त संदिप कर्णिक, अपर आयुक्त राजेंद्र डहाळे, एसीपी राजेंद्र गलांडे यांच्या मार्गदर्शनाखाली वरिष्ठ पोलिस निरीक्षक, राजेंद्र सहाणे, पोलिस निरीक्षक संगिता पाटील,उपनिरीक्षक एस सपताळे यांनी केली आहे.