गुन्हेगारी:प्रेयसीच्या पतीला धमकी; पिस्तुलाचा धाक दाखवत जीवे मारण्याची धमकी देणारा पोलिस उपनिरीक्षक निलंबित

एका पोलिस अधिकाऱ्यानी अनैतिक संबंधातून प्रियेसीच्या घरात बळजबरीने शिरून तिच्या पतीस शिवीगाळ करून, सरकारी पिस्तूलचा धाक दाखवून जीवे मारण्याची धमकी दिल्या प्रकरणी, संबंधित पोलिस उपनिरीक्षकावर कोथरूड पोलिस ठाण्यात गुन्हा दाखल करण्यात आला आहे, अशी माहिती पोलिसांनी शनिवारी दिली आहे.

सदरचा प्रकार उघडकीस आल्यानंतर अतिरिक्त पोलिस आयुक्त डाॅ. जालिंद सुपेकर यांनी सदर पोलिस उपनिरीक्षकास पुणे पोलिस दलातून निलंबित करण्याचे आदेश दिले आहे.

याप्रकरणी पोलिस उपनिरीक्षक प्रविण नागेश जर्दे यांच्या विरुद्ध भादवी 452,504,506, आर्म ॲक्ट नुसार गुन्हा दाखल करण्यात आला आहे. पोलिस उपनिरीक्षक प्रविण जर्दे यांच्याकडे न्यायालयीन आवार बंदोबस्ताची जबाबदारी सध्या सोपविण्यात आली आहे.

जर्दे यापूर्वी कोथरुड पोलिस ठाण्यात नियुक्तीस होते. याबाबत एका 43 वर्षीय व्यक्तीने कोथरुड पोलिस ठाण्यात फिर्याद दिली आहे. तक्रारदाराच्या पत्नीचे उपनिरीक्षक जर्दे यांच्याशी काही वर्षापासून अनैतिक संबंध होते.त्यामुळे तक्रारदाराने पत्नीला अनैतिक संबंध तोडण्यास सांगितले होते. पत्नीने जर्देला याबाबत घटनेची माहिती दिली. त्यानंतर जर्दे तक्रारदाराच्या घरात बळजबरीने शिरला. तक्रारदाराची आई आणि मुलांना त्याने शिवीगाळ केली.

यापुढे पत्नीला काही बोलला तर गाठ माझ्याशी आहे, असा दम भरून उपनिरीक्षक जर्दे यांनी त्यांच्याकडील कंबरलेला लावलेल्या पिस्तुलाला हात लावला आणि तक्रारदारास जीवे मारण्याची धमकी दिली. त्यामुळे घाबरलेल्या पतीने याबाबत पोलिसांकडे तक्रार दिली. त्यानंतर याबाबत गुन्हा दाखल करण्यात आला आहे. त्यानंतर जर्दे यांना पोलिस दलातून निलंबित करण्याचे आदेश दिले गेले आहे.