धुलिवंदन आणि रंगपंचमीला 21 वर्षांपासून अभियान:मानवी साखळीद्वारे प्रबोधन करून खडकवासला जलाशयाचे प्रदूषण रोखले

धुलिवंदन आणि रंगपंचमी या दिवशी आयोजित केले जाणारे खडकवासला जलाशय रक्षण अभियान सलग 21 व्या वर्षीही राबविण्यात आले. हिंदु जनजागृती समिती, खडकवासला ग्रामस्थ आणि समविचारी संघटना यांच्या वतीने हे अभियान मंगळवारी राबवण्यात आले.

यावेळी खडकवासला जलाशयाभोवती मानवी साखळी करून जनतेचे प्रबोधन केले आणि त्यांना धरणामध्ये उतरू दिले नाही. धूलिवंदन आणि रंगपंचमी या दिवशी रंग खेळून जलाशयात उतरणे, हिंदु सणांच्या नावाखाली होणारे अपप्रकार थांबविणे, तसेच हिंदूंना धर्मशास्त्र माहिती व्हावे यासाठी हिंदु जनजागृती समिती तर्फे प्रबोधन करण्यात आले आहे.

भगवान श्रीकृष्णाच्या प्रतीमा पुजनाने अभियानाला प्रारंभ झाला. या प्रसंगी खडकवासला मतदार संघाचे विद्यमान आमदार भीमराव तापकीर यांनी अभियानाचे उद्घाटन केले. खडकवासला विधानसभा मतदारसंघ आणि भाजपचे अध्यक्ष सचिन मोरे, खडकवासल्याचे माजी सरपंच विजय कोल्हे, माजी नगरसेवक बाळासाहेब नवले, व्यापारी संघटना पुणेचे अध्यक्ष गिरीश खत्री, हिंदु जनजागृती समितीचे पराग गोखले यांसह अन्य मान्यवर याप्रसंगी उपस्थित होते.

यावेळी भीमराव तापकीर म्हणाले की, ’हिंदु जनजागृती समिती मागील 21 वर्षे 22 लाख लिटर पाणी स्वच्छ ठेवण्याचे कार्य करत आहेत ही आदर्श बाब आहे. खडकवासला पाटबंधारे पुणे विभागाचे कार्यकारी अभियंता विजय पाटील, खडकवासला पाटबंधारे पुणेचे शाखा अभियंता सुभाष शिंदे, खडकवासला धरण पाटबंधारे विभागाचे स्थापत्य अभियंता दत्तात्रय कापसे, सिंहगड रोड, क्षेत्रीय कार्यालयाचे आरोग्य निरीक्षक रुपेश मते, प्राध्यापक सविता कुलकर्णी, गोर्हे बुद्रुकचे उपसरपंच सुशांत उपाख्य बाबा खिरीड यांनीही अभियान स्थळी भेट दिली आणि अभियानात सहभागी झाले.

पाटबंधारे विभागाच्या वतीने धरण परिसरात सूचनात्मक फलक लावण्यात आले अश्या प्रकारे सहभागी होत हे अभियान यशस्वी केले.अशाच प्रकारे रंगपंचमीच्या दिवशी म्हणजे 12 मार्चलाही हे अभियान राबवण्यात येणार आहे. यामध्ये सहभागी होण्याचे आवाहन समितीच्या वतीने करण्यात आले आहे.