पुणे विमानतळावर तरुणीचा राडा:सीआयएसएफ अधिकाऱ्याची कॉलर खेचत घेतला चावा; तरुणी गजाआड

पुणे विमानतळावर पश्चिम बंगालला जाण्यासाठी आलेल्या एका 24 वर्षीय तरुणीने विमानतळावर धिंगाणा घालत महिला सीआयएसएफ इनस्पेक्टरच्या ड्रेसची काॅलर पकडून त्यांना मारहाण करुन शासकीय कर्तव्यात अडथळा निर्माण केल्याने विमानतळ पोलिसांनी संबंधित महिलेस अटक केली आहे. गुंजन राजेशकुमार अग्रवाल (वय-24,रा.हावडा, वेस्ट बंगाल) असे अटक करण्यात आलेल्या महिलेचे नाव आहे अशी माहिती पोलिसांनी साेमवारी दिली आहे.

याबाबत विमानतळ पोलिस ठाण्यात पुणे विमानतळावरील सीआयएसएफ इन्सपेक्टर रुपाली भिमराव ठाेके (वय-39) यांनी आराेपी विराेधात फिर्याद दाखल केली आहे. सदरची घटना 12 मार्च राेजी रात्री बारा वाजण्याच्या सुमारास पुणे विमानतळावर प्रस्थान गेट क्रमांक एकवर घडलेली आहे.

पोलिसांनी दिलेल्या माहितीनुसार, आराेपी तरुणी गुंजन आग्रवाल हिने टॅक्सीने प्रवास करुन विमानतळ परिसरात १२ मार्च राेजी रात्री आली. परंतु तिने टॅक्सी ड्रायव्हरचे पैसे दिले नाही त्यामुळे तिचे टॅक्सी ड्रायव्हर साेबत वाद झाले. अखेर टॅक्सी ड्रायव्हरने याबाबत एअरपाेर्ट अॅथाॅरीटीकडे मदत मागितली. त्यावेळी पुणे विमानतळावरील टर्मीनल मॅनेजर भक्ती लुल्ला यांनी आराेपी गुंजन अग्रवाल यांचेकडे विचारणा केली असता, त्यांना तरुणीने शिवीगाळ करुन एअरपाेर्ट प्रस्थान गेट क्रमांक एक समाेरील रांगेत प्रवाशांना उपद्रव केला. त्यामुळे सदरचा गाेंधळ आणि आरडाओरड ऐकून सीआयएसएफ इन्सपेक्टर रुपाली ठाेके या संबंधित ठिकाणी गेल्या. त्यांनी गुंजन हिला शांत करत समजवून सांगण्याचा प्रयत्न केला. परंतु आराेपीने त्यांनाच उलटे बाेलुन त्यांच्या साेबत झटापट केली.

सीआयएसएफ इन्सपेक्टर या शासकीय कर्तव्यावर असताना देखील तरुणीने त्यांच्या शासकीय ड्रेसवरची काॅलर पकडून त्यांना गालात चापट मारली. तसेच त्यांच्या डाव्या हाताच्या अंगठयाला चावा घेऊन शासकीय कामात अडथळा निर्माण केला. अखेर सीआयएसएफच्या कर्मचाऱ्यांनी संबंधित तरुणीस ताब्यात घेऊन विमानतळ पोलिसांच्या हवाली केले. तिच्या विराेधात तक्रार दाखल झाल्यानंतर, पोलिसांनी सरकारी कामात अडथळा आणल्याचा गुन्हा तरुणीवर दाखल करत तिला अटक केली आहे. याबाबत पुढील तपास विमानतळ पोलिस ठाण्याचे पोलिस उपनिरीक्षक एस वाकडे करत आहे.