फरशीवर डोके आपटून सुनेचा खून:पुण्यात सुनेने शिवीगाळ केल्याच्या रागातून सासूने केली बेदम मारहाण, सासू अटकेत

पुण्यात सुनेने शिवीगाळ केल्याच्या रागातून सासूने फरशीवर डोके आपटून सुनेचा खून केल्याचा धक्कादायक प्रकार उघडकीस आला आहे. फ्रीज उघडत असताना सुनेला पाय लागल्याने सुनेने शिवीगाळ केली. याचा राग आल्याने सासुने सुनेच्या केसाला पकडून तिचे डाेके फरशीवर आपटले.

रितू रवींद्र माळवी (वय -28, रा. कलवड वस्ती, लोहगाव,पुणे) असे खून झालेल्या सुनेचे नाव आहे. या प्रकरणी सासू कमला प्रभुलाल माळवी (वय -49) यांना अटक करण्यात आली आहे. याबाबत पोलिस उपनिरीक्षक समु चौधरी यांनी विमानतळ पोलिस ठाण्यात तक्रार दाखल केली आहे. ही घटना 6 मार्च राेजी पहाटे तीन वाजता घडली आहे.

सातत्याने छळ झाल्याचे उघड

पाेलिसांनी दिलेल्या माहितीनुसार, सून रितू माळवीला घरकाम जमत नाही तसेच ती नातवाला व्यवस्थित सांभाळत नसल्याचा आरोप करून सासू कमला माळवी ही तिचा सातत्याने छळ करत होती. दोन दिवसांपूर्वी चहा करत असताना स्वयंपाकघरातील फ्रीज उघडताना रितूला पाय लागल्याने त्यांच्यात वाद झाला होता. त्या वेळी रितूने सासू कमलाशी वाद घातला. त्यानंतर कमलाने रितूला बेदम मारहाण केली तसेच तिचे डोके फरशीवर आपटले. या घटनेत रितुच्या डोक्याला गंभीर दुखापत झाली. तिला खासगी रुग्णालयात दाखल करण्यात आले. परंतु, उपचारादरम्यान तिचा मृत्यू झाला. शवविच्छेदन अहवालात रितुच्या डोक्याला दुखापत तसेच तिला मारहाण‌ झाल्याचे उघडकीस आले.

सासूची कसून चौकशी

पाेलिसांनी सासू कमलाची कसून चौकशी करण्यात आली. तेंव्हा तिने सुनेला बेदम मारहाण करुन तिचा खून केल्याची कबुली पाेलिसांना दिली. घटनेची माहिती मिळताच, वरिष्ठ पाेलिसांनी घटनास्थळी भेट देऊन परिस्थितीची पाहणी करुन पंचनामा केला. पोलिसांच्या तपासामध्ये सासू आणि सुनेचे वारंवार वाद होत असल्याचेही निष्पन्न झाले आहे. घटनेच्या वेळी महिलेचा पती आजारी असल्याने दुसऱ्या खोलीत आठ वर्षाच्या मुलासह झोपलेला होता, त्यामुळे त्यांना हा प्रकार समजला नाही. वानवडी पाेलिस ठाण्याचे सहायक पोलिस निरीक्षक एस. लहाने घटनेचा पुढील तपास करत आहेत.