चक्क लाॅजमध्ये वेश्याव्यवसाय!:पोलिसांचा छापा,बांगलादेशी तरुणीसह चौघींची सुटका

अहमदनगर रस्त्यावरील वाघोली परिसरात एका लाॅजमध्ये सुरू असलेल्या वेश्याव्यवसायावर गुन्हे शाखेच्या सामाजिक सुरक्षा विभागाने छापा टाकला. या कारवाईत पोलिसांनी बांगलादेशी तरुणीसह चौघींना ताब्यात घेतले. या प्रकरणी लाॅज व्यवस्थापकासह दलालांच्या विरुद्ध गुन्हा दाखल करण्यात आला अशी माहिती पोलिसांनी गुरवारी दिली आहे.

याप्रकरणी लिंबाजी सखाराम वाघमारे (वय २९, रा. आळंदी फाटा, लाेणीकंद,पुणे), प्रवीण शेखर पुजारी यांच्या विरुद्ध गुन्हा दाखल करण्यात आला आहे. याप्रकरणी वाघमारे याला अटक करण्यात आली आहे. पोलीस हवालदार मनीषा पुकाळे यांनी याबाबत लोणीकंद पोलीस ठाण्यात फिर्याद दिली आहे.

नगर रस्त्यावरील वाघोली परिसरात जयभवानी लाॅज येथे वेश्याव्यवसाय करण्यात येत असल्याची माहिती गुन्हे शाखेच्या सामाजिक सुरक्षा विभागाला मिळाली होती. त्यानुसार पोलिसांच्या पथकाने सदर ठिकाणी छापा टाकला. या कारवाईत पोलिसांनी एका बांगलादेशी तरुणीसह चौघींना ताब्यात घेतले. बांगलादेशी तरुणीसह ताब्यात घेण्यात आलेल्या पश्चिम बंगालमधील तीन तरुणींना न्यायालयाच्या आदेशाने हडपसरमधील निरीक्षणगृहात ठेवण्यात आले.

आरोपी वाघमारे आणि पुजारी यांनी तरुणींना पैशांचे आमिष दाखवून वेश्या व्यवसायास प्रवृत्त केल्या प्रकरणी गुन्हा दाखल करण्यात आला आहे. गुन्हे शाखेचे अतिरिक्त पोलीस आयुक्त रामनाथ पोकळे, उपायुक्त अमोल झेंडे यांच्या मार्गदर्शनाखाली वरिष्ठ पोलीस निरीक्षक भरत जाधव, सहायक निरीक्षक अश्विनी पाटील, राजेंद्र कुमावत, मनीषा पुकाळे, तुषार भिवरकर, हणुमंत कांबळे आदींनी ही कारवाई केली आहे.

राष्ट्रवादी काँग्रेसचे शहर उपाध्यक्ष दयानंद इरकल यांच्यावर गुन्हा

राष्ट्रवादी काँग्रेसचे पुणे शहर उपाध्यक्ष दयानंद इरकल यांच्यासह ६० ते ७० कार्यकर्त्यांच्या विरुद्ध पुणे जिल्हाधिकारी कार्यालयासमोर बेकायदा आंदोलन केल्या प्रकरणी बंडगार्डन पोलिसांनी गुन्हा दाखल केला आहे. वकील तरुणीचा विनयभंग केल्याच्या आरोपावरुन इरकल यांच्या विरुद्ध मागील महिन्यात चतु:शृंगी पोलीस ठाण्यात गुन्हा दाखल झाला होता.

याप्रकरणी दयानंद इरकल, पंकज पवार, शंकर डोंगरे, सुनील मुंढे, गोट्या बदामी यांच्यासह ६० ते ७० कार्यकर्त्यांच्या विरुद्ध गुन्हा दाखल करण्यात आला आहे. याबाबत पोलीस हवालदार नवनाथ डांगे यांनी बंडगार्डन पोलीस ठाण्यात फिर्याद दिली आहे. मागील महिन्यात १३ फेब्रुवारी रोजी एका वकील तरुणीचा विनयभंग केल्या प्रकरणी राष्ट्रवादी काँग्रेसचे शहर उपाध्यक्ष इरकल,त्यांची पत्नी आणि साथीदार अशा चौघा जणांच्या विरुद्ध चतु:शृंगी पोलिसांनी गुन्हा दाखल केला होता.

पोलिसांनी चुकीच्या पद्धतीने गुन्हा दाखल केल्याचा आरोप करुन इरकल आणि कार्यकर्त्यांनी पुणे जिल्हाधिकारी कार्यालयासमोर आंदोलन करुन पोलिसांच्या कारवाईच्या निषेध केला होता.