घृणास्पद:पुण्यात सार्वजनिक शौचालयात अल्पवयीन मुलीवर बलात्कार; नराधम फरार, पोलिसांकडून तपास सुरू

रेल्वे स्टेशनच्या हद्दीत एका बारा वर्षीय अल्पवयीन मुलीवर भरदिवसा शौचालयात बलात्कार झाल्याचा प्रकार पुण्यात उघडकीस आला आहे. शुक्रवारी दुपारी दीड वाजेच्या सुमारात ही घटना घडली आहे. या प्रकरणी बंडगार्डन पोलिस ठाण्यात गुन्हा दाखल करण्यात आला आहे. पीडित मुलीच्या आईने याप्रकरणी तक्रार दिली आहे. पुणे स्टेशन जवळील जनसेवा शौचालयात हा प्रकार घडला

पोलिसांनी दिलेल्या माहितीनुसार, पीडित मुलगी ही कुटुंबीयांसह पुणे स्टेशन परिसरातच राहण्यास असून साफसफाईची कामे करते. शुक्रवारी दुपारी ती सार्वजनिक शौचालयात गेली असता, आरोपी ही तिच्यापाठोपाठ शौचालयात गेला. त्यानंतर नराधमाने सदरील अल्पवयीन मुलीवर अत्याचार केले. त्यानंतर त्याने तिथून पळ ठोकला. पीडित मुलीने सदरील घडलेला प्रकार आईला सांगितला त्यानंतर हा प्रकार उडघकीस आला आहे. पीडित मुलीच्या आईने पोलिस स्टेशन गाठून तक्रार दिली. पोलिसांनी या प्रकरणी मारवाडी नामक एका आरोपीवर गुन्हा दाखल केला आहे.

मिळालेल्या माहितीनुसार, आरोपी हा पीडितेच्या कुटुंबीयांचा चांगला ओळखीचा आहे. तो दररोज पीडितेला आणि तिच्या कुटुंबाला भेटत होता. सध्या आरोपी पसार झाला असून, पोलिस त्याचा शोध घेण्याचा प्रयत्न करत आहेत.