तपासाला वेग:संजय राऊतांच्या धमकीप्रकरणात पुण्यातून एक आरोपी ताब्यात, पुढील तपासासाठी मुंबई पोलिसांच्या स्वाधीन

खासदार संजय राऊत यांच्या धमकीप्ररकणात पुण्यातून एका आरोपीस ताब्यात घेण्यात आले आहे. संजय राऊतांना लॉरेन्स बिष्णोई या कुख्यात टोळीच्या नावाने धमकीचा मेसेज आला होता. याप्रकरणात पुणे गुन्हे शाखेने एका संशयित आरोपीस ताब्यात घेऊन, मुंबई पोलिसांच्या स्वाधीन केले आहे.

राहुल तळेकर( वय -23 ,रा. वडगाव शेरी, पुणे) असे सदर संशयित तरुणाचे नाव असून पुणे पोलिसांनी त्यास पुढील तपास करण्याकरता मुंबई पोलिसांच्या स्वाधीन केल्याची माहिती गुन्हे शाखेचे पोलिस उपायुक्त अमोल झेंडे यांनी शनिवारी दिली आहे.

जीवे मारण्याची धमकी

खासदार संजय राऊत यांना पंजाब ,हरियाणा मध्ये वर्चस्व असलेल्या लॉरेन्स बिष्णोई टोळीकडून जीवे मारण्याचा धमकीचा मेसेज आलेला होता. या प्रकरणात पोलिसांनी तपास सुरू केला होता. त्याचसोबत राऊत यांच्या सुरक्षेत वाढ करण्यात आली होती. मुंबई पोलिसांना तांत्रिक विश्लेषणाच्या आधारे काही धागेदोरे मिळाले होते. त्यानुसार एक संशयित पुण्यात असल्याची माहिती त्यांनी पुणे पोलिसांच्या गुन्हे शाखेस कळवली होती.

एक आरोपी ताब्यात

त्यानुसार पुणे पोलिसांच्या गुन्हे शाखेच्या पथकाने, संबंधित आरोपीचा तपास करत खराडी चंदननगर परिसरातून एका हॉटेल मधून राहुल तळेकर या तरुणास ताब्यात घेतले आहे. तळेकर हा एका हॉटेलमध्ये काम करत आहे. त्याने अशाप्रकारचे कृत्य कशासाठी केले आहे, तसेच त्याचा लॉरेन्स बिष्णोई टोळीशी नेमका काय संबंध आहे, याबाबतचा तपास पोलिस करत आहे. पुणे पोलिसांनी पुढील तपासासाठी त्याचा ताबा मुंबई पोलिसांना दिल्याची माहिती वरिष्ठ पोलिस अधिकाऱ्यांनी दिली आहे.

सुरक्षा पुरवण्याची मागणी

दरम्यान, खासदार सुप्रिया सुळे यांनी संजय राऊत यांना पोलिसांनी योग्य ती सुरक्षा पुरवावी अशी मागणी केली आहे. त्याचसोबत याप्रकरणात जे आरोपी असतील त्यांचा तात्काळ शोध घ्यावा अशी मागणी केली. केंद्रीय गृहमंत्री अमित शहा यांची भेट घेऊन त्यांना याबाबत योग्य ती खबरदारी घेण्यात अशी मागणी करणार असल्याचे त्यांनी सांगितले आहे.