महापुरुषांची जयंती:पुणेकरांच्या सहभागातून शेफ विष्णू मनोहर बनवणार तब्बल 10 हजार किलोची मिसळ, 11, 14 एप्रील रोजी उपक्रम

महात्मा ज्योतिबा फुले आणि भारतरत्न डॉ. बाबासाहेब आंबेडकर यांचा आदर्श डोळ्यासमोर ठेवत त्यांच्या जयंती निमित्त पुणेकरांच्या सहभागातून तब्बल 10 हजार किलोची मिसळ बनविण्यात येणार आहे. आंतरराष्ट्रीय ख्यातीचे शेफ विष्णू मनोहर हे मिसळ बनवणार आहेत.

कधी व कुठे आयोजन?

या दोन्ही महापुरुषांच्या जयंतीनिमित्ताने दिनांक 11 आणि 14 एप्रिल रोजी गंज पेठेतील महात्मा ज्योतिबा फुले वाडा आणि पुणे रेल्वे स्टेशन रस्ता येथील डॉ.बाबासाहेब आंबेडकर पुतळा येथे ही मिसळ तयार करुन अभिवादनाकरीता येणा-या बांधवांना मिसळ वाटप करण्यात येणार आहे.

क्रांतीसूर्य महात्मा ज्योतिबा फुले आणि भारतरत्न डॉ. बाबासाहेब आंबेडकर जयंती समिती यांच्या वतीने उपक्रमाचे आयोजन करण्यात आहे, अशी माहिती संयोजन समितीतर्फे देण्यात आली.

फुले वाड्यासमोर मिसळ वाटप

मंगळवार, दिनांक 11 एप्रिल 2023 रोजी क्रांतीसूर्य महात्मा ज्योतिबा फुले वाडा येथे 5 हजार किलो मिसळ आणि दिनांक 14 एप्रिल 2023 रोजी सकाळी 7 पासून महामानव भारतरत्न डॉ. बाबासाहेब आंबेडकर पुतळा येथे 5 हजार किलो मिसळ तयार करून वाटप करण्याच्या उपक्रमाचे आयोजन करण्यात आले आहे.

आगळा वेगळा उपक्रम

माजी मंत्री बाळासाहेब शिवरकर म्हणाले, पुणेकरांनी कोणताही नव्याने सुरु केलेला उपक्रम हा समाजातील इतरांकरीता आदर्श ठरत असतो. त्यामुळेच यंदा आगळ्या - वेगळ्या पध्दतीने लोकसहभागातून 10 हजार किलो मिसळ तयार करण्याचा उपक्रम घेण्यात आला आहे.

लोकसहभाग असला की कितीही मोठी अवघड गोष्ट ही अगदी सहज मार्गी लागते, अशी हजारो उदाहरणे स्वातंत्र्यपूर्व काळापासून ते आजपर्यंत या समाजात पहायला मिळतात. याच धर्तीवर लोकसहभागासाठी लोकांनी एकत्र येण्यासाठी या उपक्रमाचे आयोजन केले आहे.

साहित्य किती लागणार?

या उपक्रमामध्ये 10 हजार किलो मिसळ बनविण्यासाठी मटकी 1000 किलो, कांदा 600 किलो, आलं 200 किलो, लसूण 200 किलो, तेल 700 किलो, मिसळ मसाला 260 किलो, लाल मिरची पावडर 50 किलो, हळद पावडर 50 किलो, मीठ 40 किलो, खोबरा कीस 140 किलो, तमाल पत्र 10 किलो, फरसाण 2400 किलो, पाणी 8000 लिटर, कोथिंबीर 100 जुडी इत्यादी साहित्य वापरण्यात येणार आहे.

माजी आमदार मोहन जोशी, आमदार सुनील कांबळे, राष्ट्रवादी कॉंग्रेस पक्षाचे शहराध्यक्ष प्रशांत जगताप, मनसेचे नेते राजेंद्र वागस्कर, शिवसेना शहराध्यक्ष प्रमोद भानगिरे, आम आदमी पक्षाचे नेते विजय कुंभार, पल्लवी जावळे यांसह सर्वपक्षीय पदाधिकारी, सामाजिक संस्था, गणेशोत्सव मंडळांनी उपक्रमात सहभाग घेतला आहे.