पुण्यातील घटना:जाहिरातींना लाइक्सद्वारे कमाईचे आमिष; निवृत्त सुभेदाराला 1 कोटीला गंडवले

लष्करातून निवृत्त झालेल्या एका सुभेदाराला सायबर चोरट्यांनी ऑनलाइन १ कोटी १० लाख रुपयांचा गंडा घातल्याचा प्रकार उघडकीस आला आहे. याबाबत पुणे सायबर पोलिस ठाण्यात अज्ञात चोरट्यांविरुद्ध शनिवारी गुन्हा दाखल करण्यात आला आहे. याबाबत निवृत्त सुभेदाराने अनोळखी पोलिसांकडे फिर्याद दिली आहे. सायबर चोरट्यांनी निवृत्त सुभेदारास मेसेज पाठवला होता. समाजमाध्यमावर प्रसारित होणाऱ्या जाहिराती तसेच ध्वनीचित्रफितीला लाइक्स दिल्यास त्यात अल्पावधीत मोठा नफा मिळेल.

प्रत्येक दर्शक पसंतीला पैसे देण्याचे आमिष दाखवून सुरुवातीला आरोपींनी तक्रारदार निवृत्त सुभेदारास काही रक्कम बँक खात्यात दिली. विश्वास संपादन झाल्यावर आणखी नफा मिळवण्यासाठी तक्रारदार सायबर चोरट्यांच्या आमिषाला बळी पडले. या व्यवसायात गुंतवणूक केल्यास १० ते २० टक्के नफा मिळेल, असे आमिष त्यांना दाखवल्यानंतर त्यांनी १ कोटी रुपये गुंतवले.

सुभेदाराने नातेवाइकांकडून उधार घेतले पैसे निवृत्त सुभेदाराने चोरट्यांच्या खात्यात ऑनलाइन पद्धतीने एक कोटी दहा लाख रुपये वेळोवेळी जमा केले. त्यांनी नातेवाइकांकडून काही रक्कम उधारीवर घेतली होती. ही रक्कम ही त्यांनी चोरट्यांना दिली.मात्र, त्यांना कोणताही परतावा आरोपींकडून देण्यात आला नाही किंवा गुंतवणूक रक्कम परत केली गेली नाही. त्यामुळे फसवणूक झाल्याचे उघडकीस आल्यानंतर त्यांनी सायबर पोलीस ठाण्यात याबाबत तक्रार दिली. चोरट्यांनी पाच बँकातील १२ खात्यात संबंधित पैसे जमा करुन घेतले असल्याचे पोलिस तपासात उघडकीस आले.