म्हातारपणी डेटिंगचा नाद:17 लाखांचा लागला चुना

पुण्यात बँकेतून सेवानिवृत्त झालेल्या एका वृद्धाला उतारवयात डेटिंगचा नाद चांगलाच नडला. एका तरुणीने या ७९ वर्षांच्या वृद्धाला डेटिंगसाठी सहा महिन्यांपासून तब्बल १७ लाख रुपयांंचा चुना लावल्याची घटना उघडकीस आली आहे. याबाबत गुरुवारी गुन्हा दाखल करण्यात आल्याची माहिती पोलिसांनी शुक्रवारी दिली. पुण्यातील वारजे परिसरात ही घटना घडली असून याप्रकरणी सायबर पोलिसांत तक्रार देण्यात आली आहे.

पोलिसांनी दिलेल्या माहितीनुसार, ही घटना डिसेंबर २०२१ पासून जून २०२२ दरम्यान घडली. फसवणूक झालेले ७९ वर्षीय वयोवृद्ध हे बँकेतून सेवानिवृत्त झाले आहेत. त्यांना डिसेंबर महिन्यात एका अनोळखी नंबरवरून श्रेया नावाच्या मुलीचा फोन आला. तुम्हाला डेटिंगसाठी मुलगी हवी आहे का? अशी विचारणा केली. यावर वृद्धाने हाेकार दिल्यानंतर त्या तरुणीने या ज्येष्ठ व्यक्तीस काही रक्कम भरावी लागेल, असे सांगितले. पैसे भरण्यासाठी काही नंबरही दिले. रक्कम भरल्यानंतर या वृद्ध व्यक्तीला नेहमीच त्या नंबरवरून फोन येत होते. सुमारे सात महिन्यांपासून हा वृद्ध डेटिंगच्या माेहाने पैसे भरत राहिला. असे करत ७ महिन्यांत या वृद्ध व्यक्तीने आरोपी तरुणीच्या बँक खात्यात तब्बल १७ लाख रुपये भरले तरीही डेटिंग हाेत नसल्याने आपली फसवणूक झाल्याचे लक्षात येताच त्यांनी पोलिसांत धाव घेतली. याप्रकरणी अनोळखी व्यक्तीवर पुण्यातील वारजे ठाण्यात गुन्हा दाखल झाला.