क्राईम:ट्रॅव्हल कंपनीने चोरली विमान कंपन्यांची खात्याची माहिती; 62 लाख रुपयांच्या 150 विमान तिकिटाची परस्पर विक्री

पुण्यातील कोट्यावधी रुपयांचा ट्रॅव्हल व्यवसाय असलेल्या दोन नामांकित मोठ्या ट्रॅव्हल एजन्सीची आर्थिक फसवणूक करण्यात आल्याचा प्रकार उघडकीस आला आहे. पुण्यातील मुंढवा आणि रास्ता पेठ परिसरातील सदर ट्रॅव्हल कंपनीची ऑनलाइन खाजगी विमान कंपनीकडे असलेली प्रीपेड खात्यातील माहिती चोरून अज्ञात व्यक्तीने 62 लाखांची तब्बल 150 विमान तिकिटांची परस्पर विक्री केल्याचा धक्कादायक प्रकार समोर आला आहे. याप्रकरणी सायबर पोलीस ठाण्यात अज्ञात आरोपी विरोधात गुन्हा दाखल करण्यात आलेला आहे.

पोलिसांनी दिलेल्या माहितीनुसार, मुंढवा आणि रास्ता पेठ याठिकाणी सदर ट्रॅव्हल एजन्सी कार्यालय आहेत. त्यांनी तीन वेगवेगळ्या खाजगी विमान कंपन्यांशी आर्थिक व्यवहार करण्यासाठी प्रीपेड खाते उघडलेले आहे. संबंधित खात्याच्या माध्यमातून ट्रॅव्हल एजंट प्रवाशांची तिकिटे आगाऊ काढत असते. त्यासाठी काही रक्कम खाजगी विमान कंपन्यांकडे आधीच बुकिंग केलेली असते. एप्रिल महिन्यात संबंधित विमान कंपनीकडे ट्रॅव्हल्स कंपन्यांची खाती यामधील माहिती अज्ञात व्यक्तीने चोरली. त्याचा वापर करून संबंधित व्यक्तीने देशांतर्गत विमानसेवेची 148 तिकिटे आणि दोन आंतरराष्ट्रीय प्रवासाची विमान तिकिटे अशी एकूण 150 तिकिटे ऑनलाईन काढून फसवणूक केली आहे.एप्रिल महिन्याच्या अखेरीस ट्रॅव्हल कंपनी संबंधित खात्याचा आढावा घेत असताना, याबाबतची माहिती उघडकीस आली. त्यामुळे ट्रॅव्हल कंपनीने अंतर्गत चौकशी केली असता, सदर तिकिटे कंपनीने बुकिंग न करता दुसऱ्याच अनोळखी व्यक्तीने बुकिंग केल्याचे दिसून आले. त्यामुळे त्यांनी याबाबत सायबर पोलीस ठाणे तक्रार दाखल केली आहे. पोलिसांच्या तपासामध्ये वेगवेगळ्या इंटरनेटचा वापर करून तिकिटे बुकिंग करण्यात आल्याचे दिसून आले आहे. त्याचप्रमाणे मुंबई ,नवी मुंबई आणि पुणे येथील काही छोट्या ट्रॅव्हल एजंटची खात्यातील माहितीचा वापर करूनही अशा प्रकारे फसवणूक करण्यात आल्याची शक्यता आहे.त्यामुळे संबंधित विमानांच्या तिकिटावर ज्या प्रवाशांनी प्रवास केला आहे त्यांची माहिती काढून पोलीस पुढील तपास करत आहेत.