अपघात:पुण्यात सूस खिंडीत ट्रक अपघातात दोघे गंभीर

पुणे शहरात मुंबई-बंगळुरु बाह्यवळण मार्गावर पाषाण परिसरात सूस खिंडीत दोन मालवाहू ट्रकचा रविवारी सकाळी अपघात झाला. या अपघातात दोघे जण गंभीर जखमी झाले, तर ट्रकमध्ये अडकलेल्या दत्तू अंबू गोळे (६०) आणि सूरज सुर्वे (३०, रा. जि. सातारा) यांची अग्निशमन दलाच्या जवानांनी सुखरुप सुटका केली आहे.

माहितीनुसार, सूस खिंड परिसरात महिंद्रा शोरुमजवळ रस्त्याच्या कडेला पहाटे एक ट्रक थांबला होता. त्या वेळी भरधाव वेगाने साताऱ्याकडे निघालेला ट्रकने थांबलेल्या ट्रकवर पाठीमागून धडक दिली. अपघातानंतर ट्रकच्या केबिनमध्ये चालक आणि त्याचा सहकारी अडकले. अग्निशमन दलाच्या पाषाण केंद्रातील जवानांनी घटनास्थळी तात्काळ धाव घेतली. अपघातग्रस्त केबिनचा काही भाग कटरने कापून जवानांनी गोळे व सुर्वे यांची सुखरुप सुटका केली. त्यांच्या पायाला दुखापत झाली होती. दोघांना तातडीने खासगी रुग्णालयात दाखल करण्यात आले आहे. अग्निशमन अधिकारी शिवाजी मेमाणे, लतेश चौधरी, विष्णू राऊत, ज्ञानदेव गोडे, अब्दुल पटेल यांनी मदतकार्य केले.