मंद्रूप पोलिसांची कारवाई:महामार्गावर ट्रक लुटणारी टोळी जेरबंद; चौघांना अटक‎

राष्ट्रीय महामार्गावरील चालत्या मालट्रकमधून‎ केबलची चोरी करणाऱ्या चार चोरट्यांच्या‎ टोळीला मंद्रूप पोलिसांनी अटक केली. या‎ चारही संशयितांकडून दोन लाख ८८ हजार‎ १८० किमतीचा मुद्देमाल हस्तगत केला.‎ गुन्ह्यात वापरलेली एक लाख ६५ हजार रुपये‎ किमतीच्या दोन मोटारसायकली व एक अॅटो‎ रिक्षा जप्त केली. एकूण साडेचार लाखांचा‎ मुद्देमाल हस्तगत केला.‎

अंबादास नामदेव कुंभार (वय २७,रा.‎ औज (मं), ता. दक्षिण सोलापूर), सतीश‎ वैजिनाथ माने (वय ३४, रा. सैफुल,‎ सोलापूर), अमोल कट्याप्पा गायकवाड,‎ (वय २८, रा. वडकबाळ, ता. दक्षिण‎ सोलापूर) व सोमनाथ यशवंत भालेराव (वय‎ २९, रा. भवानी पेठ, सोलापूर) यांना‎ मुद्देमालासह अटक केली.‎ तेलंगवाडी (ता. मोहोळ) ते नांदणी (ता.‎ दक्षिण सोलापूर) या दरम्यान १३ डिसेंबर रोजी ‎रात्री मालट्रक आडवून चोरीचा प्रकार घडला ‎होता.

याप्रकरणी बबन माणिकराव गवई (रा.सावखेडा भुई, ता. देऊळगाव राजा, जि. ‎ ‎ बुलढाणा) यांनी मंद्रूप पोलिसात फिर्याद दिली ‎ ‎ होती. गवई यांच्या ट्रकमधून ६ लाख ८३ हजार ‎ ‎ ४९८ रुपयांच्या केबल वायरची चोरी झाली‎ होती. सहायक पोलिस निरीक्षक रवींद्र मांजरे, सहाय्यक फौजदार संदीप काशीद, पोलिस‎ शिपाई संदीप काळे, दिनेश पवार यांच्या‎ पथकाने ही कामगिरी केली.‎

रात्री ट्रक चालकांनी खबरदारी घ्यावी‎

कामती ते मंद्रूप या महामार्गावरून रात्रीच्या वेळी‎ प्रवास करताना ट्रक चालकांनी अज्ञात वाहन अथवा‎ व्यक्ती दिसल्यास वाहन थांबवू नये. खबरदारी घेऊन‎ वाहन चालवावे. काही संशयास्पद घटना घडल्यास‎ पोलिसांशी संपर्क साधावा. ट्रक मधून चोरी‎ करणाऱ्या वरील चारही आरोपींची कसून चौकशी‎ करीत आहोत. यापूर्वी त्यांचा कोणत्या गुन्ह्यात‎ सहभाग आढळल्यास गुन्हा दाखल होईल.’’-‎ रवींद्र मांजरे, सहाय्यक पोलिस निरीक्षक‎