दिव्य मराठी विशेष:शंभरामध्ये एखाद दुसरा विद्यार्थीच लठ्ठ‎

येथील डाॅ. वैशंपायन स्मृती वैद्यकीय‎ महाविद्यालयाने शहरातील निवडक‎ शाळांतील मुलांची उंची आणि वजन‎ तपासणी केली. यातून शालेय मुलांमध्ये‎ लठ्ठपणाची समस्या अगदीच नगण्य‎ असल्याची सकारात्मक बाब पुढे आली.‎ तपासणी केलेल्या १०९० विद्यार्थ्यांमध्ये‎ केवळ १८ विद्यार्थी लठ्ठ आढळले.‎ मुलांमधील स्थूलपणाचे राज्यातील‎ सरासरी प्रमाण ३.७८ टक्के असताना‎ सोलापुरातील मुलांत हेच प्रमाण केवळ‎ १.६५ टक्के दिसून आले आहे. याचे संपूर्ण‎ श्रेय सोलापुरातील शाळा जागरुकता,‎ शिस्त आणि पालकांची मिळणारी साथ‎ याला जाते.

शहरातील बहुतेक शाळांत‎ जंक फूड आणण्यास मनाई आहे.‎ वैद्यकीय शिक्षण मंत्री गिरीष महाजन‎ यांच्या मार्गदर्शनाने शालेय मुलांची उंची,‎ वजन तपासणी मोहीम राबवली जात आहे.‎ मुलांमधील लठ्ठपणावर वेळीच नियंत्रण‎ मिळवण्यासाठी राज्यातील २३ वैद्यकीय‎ महाविद्यालयांकडून एकच दिवशी या‎ मोहिमेची सुरुवात झाली.

त्यानुसार‎ सोलापूर शहरातील मनपा कॅम्प शाळा,‎ सावित्रीबाई फुले इंग्लिश मीडियम स्कूल,‎ मनपा उर्दू शाळा कॅम्प, मॉडर्न हायस्कूल‎ आणि सिद्धेश्वर प्रशाला या पाच (तीन‎ सरकारी आणि दोन खासगी) शाळांची‎ निवड केली होती. यात सातवी ते नववीच्या‎ एकूण ७४७ मुले व ३४३ मुलींची उंची व‎ वजन यांचे गुणोत्तर काढले. १६ गटांतून ६४‎ डॉक्टरांनी या तपासणी केली. राज्यात‎ एकूण १४ हजार २७८ मुलांची तपासणी‎ केली असता ५४० मुले लठ्ठ आढळली.‎

शाळेतून आणली जाते जागरूकता‎
मुलांनी डब्यात पोळी, भाजी आणली पाहिजे यावर वर्ग‎ ‎ शिक्षकांमार्फत लक्ष देण्यात येते.‎ ‎ वर्षातून दोन ते तीन कार्यशाळा घेण्यात‎ ‎ येतात. भरड धान्याची माहिती दिली‎ ‎ जाते. बाजरी दिनी सर्व विद्यार्थ्यांच्या‎ ‎ डब्यांत बाजरीचे पदार्थ होते. आता‎ ‎ नाचणी दिन आहे. दरमहा एक धान्य‎ दिन असतो. जंक फूडला मनाई आणि पोळी, भाजी,‎ भाकरीला प्राधान्य आहे. शिक्षण समिती सदस्य डाॅ.‎ राजशेखर येळीकर यांचे मार्गदर्शन असते ''- एस. बी. पाटील, प्राचार्य, श्री सिद्धेश्वर प्रशाला‎

लठ्ठपणाची आहेत ही कारणे
जंक फूड, वारंवार खाणे, जास्त खाणे, गोड खाणे,‎ व्यायामाचा अभाव आणि काही आजार.‎