दिव्य मराठी एक्सक्लुझिव्ह‎:भाजपवर नाराज राष्ट्रीय समाज‎ ‎पक्षाचे "आपल्या चौकात आपली औकात'' मिशन‎

भाजपकडून युतीसाठी फारसा प्रतिसाद मिळत‎ नसल्याने नाराज झालेल्या राष्ट्रीय समाज‎ ‎पक्षाचे नेते महादेव जानकर‎ ‎ यांनी आगामी स्थानिक‎ ‎ स्वराज्य संस्थांच्या‎ ‎ निवडणुका स्वबळावर‎ ‎ लढून भाजपला त्यांची‎ ‎ जागा दाखवून देण्याचा‎ रोडमॅप तयार केला आहे. त्यासाठी त्यांनी‎ अर्थपूर्ण तयारी केली आहे. एका कार्यक्रमात‎ रासप कार्यकर्त्यांनी त्यांच्या गळ्यात २ लाख‎ ५५ हजार रुपयांच्या नोटांचा हार घालून सत्कार‎ केला. २०० विधानसभा मतदारसंघांतील‎ कार्यकर्त्यांकडून पक्षासाठी ५ लाखांचा निधी‎ मिळाल्याची माहिती जानकर यांनी दिली.‎ २०१४मध्ये त्यांनी बारामतीतून सुप्रिया सुळे‎ यांच्याविरोधात लोकसभा निवडणूक‎ लढवली. ६९ हजार ७१९ मतांनी ते पराभूत‎ झाले असले तरी त्यांनी सुळे यांना जोरदार‎ टक्कर दिली होती.

फडणवीस यांच्या‎ नेतृत्वातील सरकारमध्ये जानकर यांचा पक्ष‎ सहभागी होता. त्यांना विधान परिषदेवर संधी‎ देण्यात आली. मंत्रिपदही मिळाले होते. पण‎ फडणवीस सरकार गेले. जानकरांचा‎ आमदारपदाचा कार्यकाळ संपला. तत्पूर्वीच‎ रासप आणि भाजपमध्ये दुरावा निर्माण झाला.‎ हा दुरावा आता ठळकपणे नुकत्याच झालेल्या‎ पक्षाच्या कार्यक्रमात जाणवत आहे. तेथे‎ जानकर म्हणाले, आगामी महापालिका, नगर‎ परिषद, जिल्हा परिषद, पंचायत समिती‎ निवडणुका स्वबळावर लढण्याची तयारी‎ आम्ही केली आहे. विधानसभा आणि‎ लोकसभा निवडणुकीला थोडा उशीर असला‎ तरीही आमची पक्षबांधणी सुरू आहे. राज्यात‎ ९० हजार मतदान बूथ आहेत. त्यापैकी ३०‎ हजार बूथपर्यंत आम्ही पोहोचलो आहोत. ६०‎ हजार मतदान बूथवर पोहोचण्याचा आमचा‎ प्रयत्न आहे.‎

रासपचे आक्रमक मिशन
इलेक्शन‎ ‘आपल्या चौकात आपली औकात’ हे मिशन ठरवून कार्यकर्ते कामाला‎ लागले आहेत. भाजप असो वा काँग्रेस, राष्ट्रवादी, शिवसेना आणि‎ एकनाथ शिंदे यांचा पक्ष, निवडणुकीत युती अथवा आघाडीसाठी‎ आम्हाला सोबत घ्या, म्हणून आम्ही त्यांच्या मागे जाणार नसल्याचे त्यांनी‎ स्पष्ट केले आहे.‎

चार राज्यांत मिळाली‎ पक्षाला मान्यता‎
राष्ट्रीय समाज पक्षाला आज‎ चार राज्यांमध्ये मान्यता‎ मिळाली आहे. गुजरातमध्ये‎ रासपचे ४० नगरसेवक आहेत.‎ उत्तर प्रदेश विधानसभा‎ निवडणुकीत ११० उमेदवार उभे‎ होते. त्यातील एकही निवडून‎ आला नसला तरी मतांची‎ टक्केवारी वाढली आहे.‎ बंगळुरूमध्ये उमेदवार उभा‎ केल्याचे त्यांनी सांगितले.‎

शेट्टींप्रमाणे जानकरांचेही एकला चलो रे धोरण‎ ‎
गेल्या आठवड्यात स्वाभिमानी शेतकरी संघटनेचे सर्वेसर्वा, माजी‎ खासदार राजू शेट्टी यांनी आगामी निवडणुकीत कुणाशीही युती करणार‎ नाही. स्वबळावर लढणार असल्याचे घोषित केले. शेट्टींप्रमाणे‎ जानकरांचीही ‘एकला चलो रे’ची तयारी दिसते. जानकर यांनी‎ ‎मविआतून बाहेर पडल्यास उद्धवसेनेशी युतीची तयारी केली आहे.‎