स्थित्यंतर:महसूल भवनचा 14 वर्षांचा वनवास‎ संपला, मंगळवारी लोकार्पण‎; अपर जिल्हाधिकारींसह 16 कार्यालयांना मिळाले स्थान‎

सन २००९ मध्ये तत्कालीन केंद्रीय मंत्री शरद पवार आणि‎ सुशीलकुमार शिंदे यांच्या हस्ते भूमिपूजन झालेल्या‎ महसूल भवनाच्या लोकार्पणाला १४ वर्षानंतर मुहूर्त‎ मिळाला. मंगळवारी १६ मे रोजी उपमुख्यमंत्री देवेंद्र‎ फडणवीस आणि महसूलमंत्री तथा जिल्ह्याचे पालकमंत्री‎ राधाकृष्ण विखे-पाटील यांच्या हस्ते महसूल भवन‎ इमारतीचा लोकार्पण सोहळा होणार आहे.

या इमारतीमध्ये‎ जिल्हाधिकारीसह १६ कार्यालये असणार आहेत. उर्वरित‎ कार्यालये जुन्या इमारतीमध्येच राहतील. जिल्ह्याच्या‎ विकासाचे निर्णय घेणाऱ्या महसूल भवन इमारतीच्या‎ पूर्णत्वासाठी १४ वर्षे शासनाकडे वाट पहावी लागली.‎ १४ वर्षांच्या दीर्घ प्रतीक्षेनंतर जिल्हाधिकारी‎ कार्यालयाची नवीन इमारत वापरासाठी खुली होणार आहे. ‎

मंगळवारी लोकार्पण झाल्यानंतर कामकाज नवीन ‎ ‎ इमारतीतूनच होणार आहे. उद्घाटन झाल्यानंतर गौण‎ खनिज, नगर परिषद, पुनर्वसन विभाग तत्काळ सुरू‎ होतील. जिल्हाधिकारीसह अन्य कार्यालये सुरू होतील‎ पण तेथे दप्तर पूर्ववत होण्यास २० मे पर्यंतचा कालावधी‎ लागणार असल्याचे निवासी उपजिल्हाधिकारी शमा पवार‎ यांनी सांगितले.‎

उपमुख्यमंत्री फडणवीस यांच्या हस्ते महसूल भवनचे‎ लोकार्पण झाल्यानंतर हेरिटेज गार्डन येथील कार्यक्रमातच‎ नूतनीकरण झालेल्या इंद्रभुवनचेही लोकार्पण होणार आहे.‎ स्मार्ट सिटीतून ४ कोटी ७० लाख रुपये खर्चून इमारतीचे‎ सुशोभीकरण करण्यात आले आहे. सोलापूरचे शिल्पकार‎ पुण्यश्लोक अप्पासाहेब वारद यांनी उभारलेली ही वास्तू‎ जनतेला पाहण्यासाठी सकाळी ९ ते सायंकाळी ६‎ वाजेपर्यंत खुली असणार आहे.‎

जिल्हाधिकारी, जिल्हाधिकाऱ्यांचे स्वीय सहाय्यक, अप्पर जिल्हाधिकारी,‎ अप्पर जिल्हाधिकाऱ्यांचे स्वीय सहाय्यक, निवास उपजिल्हाधिकारी,‎ नागरिकांसाठी कक्ष, व्हीआयपी कक्ष, राजशिष्टाचार, नैसर्गिक आपत्ती,‎ महसूल, गृह, आस्थापना, लेखा विभाग, अंतर्गत लेखा विभाग, सामान्य‎ प्रशासन, कुळ कायदा, गौण खनिज, ग्रामपंचायत, पुनर्वसन, नगर विकास‎ शाखा नवीन इमारतीमध्ये स्थलांतर होतील तर जुन्या जिल्हाधिकारी‎ कार्यालयात रोजगार हमी, निवडणुक, जिल्हा व शहर पुरवठा, भूसंपादन‎ क्रमांक १,३,७,११ ही कार्यालये असणार आहेत.‎

पालकमंत्री विजयसिंह‎ मोहिते-पाटील व जिल्हाधिकारी‎ डॉ. जगदीश पाटील यांच्या‎ कालावधीत २००९ मध्ये‎ भूमिपूजन झाले. त्यानंतर विजय‎ देशमुख, दिलीप वळसे-पाटील,‎ जितेंद्र आव्हाड, दत्तात्रय भरणे हे‎ पालकमंत्री झाले तर‎ जिल्हाधिकारी डॉ. पाटील‎ यांच्यानंतर गोकुळ मवारे, डॉ.‎ प्रवीण गेडाम, तुकाराम मुंढे,‎ रणजितकुमार, डाॅ. राजेंद्र भोसले‎ हे जिल्हाधिकारी होऊन गेले तरी‎ इमारत पूर्णत्वास आली नाही.‎ अखेर जिल्हाधिकारी मिलिंद‎ शंभरकर यांच्या कालावधीत‎ इमारत पूर्ण झाली आणि त्याचे‎ आता लोकार्पण होत आहे.‎

५ पालकमंत्री आणि ६‎ जिल्हाधिकारी बदलले...‎

महसूल भवन परिसरात जागेची कमतरता‎ आहे. तेथे अनेक झाडे असल्याने एक हजार‎ नागरिक बसतील अशी व्यवस्था करणे‎ अडचणीचे आहे. त्यामुळे महसूल भवन येथे‎ औपचारिक उद्घाटन करून कार्यक्रम इतरत्र‎ करण्याची तयारी सुरू आहे. उपमुख्यमंत्री देवेंद्र‎ फडणवीस येणार असल्याने त्यांचे चाहते‎ आणि भाजपचे कार्यकर्ते गर्दी करतील.‎

परिणामी त्या परिसरात सुमारे दोन तासापर्यंत‎ वाहतूक बंद ठेवावी लागणार आहे. यातून मार्ग‎ काढत इतरत्र कार्यक्रम करण्यात येणार‎ असल्याचे सांगण्यात आले.‎