‎ उत्कर्ष महोत्सव:पथनाट्यातून समाज प्रबोधन अन् समूहगीतातून देशभक्तीचा जागर‎

स्त्री अत्याचार, पुरुषप्रधान संस्कृती, स्त्री-पुरुष‎ समानता, जातीयवाद, धर्मवाद, महागाई, भ्रष्टाचार,‎ बेरोजगारी यासोबतच राज्यातील सत्तांतर महानाट्यावर‎ संपूर्ण महाराष्ट्रातील तरुणाईने पथनाट्यातून टीकास्त्र‎ सोडत समाजप्रबोधन केले. समूहगीतामधून‎ देशभक्तीचा जागर झाला, तर लोकगीतांवर‎ महोत्सवातील तरुणाईने नाचत आनंद द्विगुणीत केला.‎

संत तुकडोजी महाराज नागपूर विद्यापीठाच्या‎ विद्यार्थ्यांनी पाणी विषयावर चांगले पथनाट्य सादर‎ केले. नाशिकच्या आरोग्य विज्ञान विद्यापीठाने‎ अवयदानावर पथनाट्य केले. संत गाडगेबाबा‎ अमरावती विद्यापीठ, गोंडवाना विद्यापीठ गडचिरोली,‎ शिवाजी विद्यापीठ कोल्हापूर, पुण्यश्लोक अहिल्यादेवी‎ होळकर सोलापूर विद्यापीठ, मुंबई विद्यापीठाच्या‎ संघांनीही पथनाट्ये सादर केली. त्याला दाद मिळाली.‎ सावित्रीबाई फुले पुणे विद्यापीठाने उत्कृष्टरीतीने‎ ‘प्रश्न विचारायलाच हवे’ या विषयावर पथनाट्य केले.‎

महाराष्ट्रातील मोठे प्रकल्प अन्य राज्यात गेले,‎ राज्यातील सत्तांतर यासोबतच भगव्या रंगाच्या‎ बिकिनीची चर्चा, प्रसार माध्यमांचे अस्तित्व धोक्यात‎ आदी विषयांना स्पर्श केले.‎ महाराष्ट्र शासनाच्या उच्च व तंत्र शिक्षण‎ विभागातील राष्ट्रीय सेवा योजना कक्ष आणि सोलापूर‎ विद्यापीठ यांच्या संयुक्त विद्यमाने राज्यस्तरीय‎ सामाजिक व सांस्कृतिक उत्कर्ष महोत्सव होत आहे.‎ त्याचा बुधवारी तिसरा दिवस होता.विद्यापीठ कॅम्पसमधील हॉलीबॉल मैदानावर‎ पथनाट्याच्या स्पर्धा रंगल्या. त्यानंतर निबंध स्पर्धा पार‎ पडली. दुपारी मुख्य रंगमंचावर समूहगीताच्या स्पर्धा‎ खूपच जल्लोषात झाल्या. सायंकाळी भितीचित्र आणि‎ वक्तृत्व स्पर्धा झाल्या.‎

फोटोग्राफीला दाद‎
महोत्सवाच्या सुरुवातीपासून‎ शेवटच्या दिवसापर्यंत फोटो‎ काढून त्यातील निवडक‎ पंधरा फोटो स्पर्धकांनी‎ बुधवारी सायंकाळी‎ संयोजकांकडे सोपविले.‎ त्याचे परीक्षण झाले असून‎ उद्या सर्व स्पर्धेचा निकाल‎ कळेल व समारोप समारंभात‎ पारितोषिके वितरण होईल.‎