फसवणूक:दुसऱ्याला परीक्षेला बसवून दिले‎ टायपिंग प्रमाणपत्र, दोघांवर गुन्हा‎

दुसऱ्याच्या नावे मराठी टायपिंग परीक्षेला बसवून टायपिंग कौशल्य‎ असल्याचे प्रमाणपत्र देऊन एमकेसीएल लिमिटेडची फसवणूक‎ केली. या प्रकरणी दोघांवर गुन्हा दाखल झाला आहे. अेविस‎ काॅम्प्युटरर्सचे प्रमुख अविनाश उत्तरेश्वर मठपती आणि‎ व्यवस्थापक श्रावणी पाटील यांच्यावर गुन्हा दाखल झाला.‎ फौजदार चक्रधर ताकभाते यांनी विजापूर नाका पोलिसात सहा‎ मार्च रोजी रात्री फिर्याद दिली आहे.‎ विजापूर रोड आयटीआय पोलिस चौकीच्या बाजूला अेविस‎ काॅम्प्युटर्स सेंटर आहे. चक्रधर ताकभाते यांना मराठी टायपिंग‎ प्रमाणपत्र पाहिजे होते. या सेंटरमध्ये जाऊन मराठी टायपिंग‎ प्रमाणपत्राची विचारणा केली‌. पैसेही भरले.

त्यांच्या नावे‎ एमकेसीएल लिमिटेड (महाराष्ट्र ज्ञान महामंडळ, पुणे) काॅम्प्युटर‎ टायपिंग स्पीड टेस्ट ३७ शब्द प्रतिमिनीट या गतीचे एमकेसीएल‎ संचालक यांचे सहीचे व शिक्का असलेले प्रमाणपत्र दिले.‎ दरम्यान, एमकेसीएल लिमिटेड अंतर्गत प्रशिक्षण देणारी अेविस‎ काॅम्प्युटर सेंटर येथे कोणत्याही प्रकारे मराठीत काॅम्प्युटर टायपिंग‎ सराव व परीक्षा दिली नसताना फौजदार ताकभाते यांच्या ऐवजी‎ कोणाला तरी परीक्षेला बसवून त्यांना प्रमाणपत्र दिले. स्वतःच्या‎ आर्थिक फायद्यासाठी एमकेसीएल लिमिटेडची फसवणूक केली‎ म्हणून दोघांवर गुन्हा दाखल झाला आहे. सहाय्यक पोलिस‎ निरीक्षक देशमुख तपास करत आहेत. याबाबत त्यांना विचारले‎ असता अजून याबाबत चौकशी सुरू आहे. दोघांचा शोध सुरू‎ असल्याचे ते म्हणाले.‎