टप्पा अनुदान प्रक्रियेविषयी‎ आमदारांचा फोन:‘नियमाप्रमाणे काम’ भोवले ...‎ वठारे यांचा प्रभार काढून घेतला‎

टप्पा अनुदान वाटपाच्या प्रक्रियामुळे प्रभारी‎ शिक्षणाधिकारी सुलभा वठारे वादाच्या‎ भोवऱ्यात अडकल्या. आमदारांचे फोन व‎ कार्यालयातील एका लिपिकाच्या पुढाकारामुळे‎ मुख्य कार्यकारी अधिकारी दिलीप स्वामी यांनी‎ तडकाफडकी अतिरिक्त पदभार काढून तो‎ महिला व बालकल्याणचे अधिकारी जावीद‎ शेख यांच्याकडे दिला आहे. वठारे यांनी‎ नियमावर बोट ठेवून अनेक प्रस्तावांमध्ये त्रुटी‎ काढल्या. त्याचा परिणाम भोगावा लागल्याची‎ चर्चा आहे. दरम्यान, शेख यांच्यावर अपहाराचा‎ ठपका आहे.‎ शिक्षणाधिकारी भास्करराव बाबर यांची पुणे‎ येथे बदली झाली आहे.

त्यानंतर अतिरिक्त‎ पदभार वठारे यांच्याकडे देण्यात आला. त्यानंतर‎ शासन स्तरावरून घोषित व अघोषित शाळांना‎ टप्पा अनुदान घोषित करण्यात आले. त्याचे‎ प्रस्ताव तपासणी अनुदान वाटप आदेश देण्याची‎ प्रक्रिया सुरू करण्यात आली. मात्र वठारे यांनी‎ प्रत्येक प्रस्तावाची पडताळणी करून अनुदान‎ देण्याची प्रक्रिया पूर्ण केली. एक हजाराहून‎ अधिक शिक्षकांच्या प्रस्तावामध्ये त्रुटी आढळून‎ आल्या. या त्रुटी दुरुस्त करण्याच्या कामासाठी‎ शुक्रवारी व शनिवारी माध्यमिक शिक्षण‎ विभागात मोठी गर्दी होती. माजी आमदार‎ दत्तात्रय सावंत यांनीही भेट देऊन शिक्षकांचे‎ प्रश्न मार्गी लावण्यास सांगितले.‎ वठारे यांनी ‘नियमात आहे तेच करणार‎ आहे’, असे सांगितले. शिक्षकांमध्ये‎ त्यांच्याविषयी रोष निर्माण झाला.‎