सैन्यातही 89 अ‍ॅप्सवर बंदी:लष्कराला माहिती लीक होण्याची भीती, सैनिकांना फेसबुक, इन्स्टाग्राम आणि टिकटॉक सारखे अ‍ॅप्स डिलीट करण्यास सांगितले

संरक्षण मंत्रालयाने लष्करातील 13 लाख जवान आणि अधिकाऱ्यांना त्यांच्या फोनमधून डेली न्यूज हंट न्यूज अ‍ॅप, फेसबुक, इन्स्टाग्राम, टिकटॉक, झूम, पब्जीसह 89 अ‍ॅप्स 15 जुलैपर्यंत डिलीट करण्याचे निर्देश दिले आहेत. संरक्षण मंत्रालयाच्या सूत्रांनुसार, या अ‍ॅप्समुळे देशातील संवेदनशील माहिती लीक होत आहे. देशाच्या सुरक्षेसाठी धोका मानत लष्कराने म्हटले आहे की, जे या आदेशांचे पालन करणार नाहीत त्यांच्याविरुद्ध कडक कारवाई केली जाईल. या 89 अ‍ॅप्समध्ये 59 चिनी अ‍ॅपचाही समावेश आहे. ज्यांच्यावर नुकतीच सरकारने बंदी घातली आहे.

एका अधिकाऱ्याने सांगितले की, लष्करातील जवानांना आॅनलाइन टार्गेट करण्याचे प्रकार वाढले आहेत. सोशल मीडियावर लष्करी कर्मचाऱ्यांना हनीट्रॅपमध्ये अडकवून पाकची गुप्तचर संस्था आयएसआयसाठी हेरगिरी करत असल्याच्या घटना उघडकीस आल्या. लष्कराचा दावा आहे की, अ‍ॅपद्वारे माहिती मिळवून पाकिस्तान व चीनसारखे देश सीमा व नियंत्रण रेषेवर अडचणी निर्माण करत आहेत. लष्कराने नोव्हेंबरमध्ये कर्मचाऱ्यांना कामकाजासाठी व्हॉट्सअ‍ॅपचा वापर टाळण्याचा सल्ला दिला होता. संवेदनशील पदांवरील अधिकाऱ्यांना फेसबुक अकाउंट डिलीट करण्याची सूचनाही यापूर्वी करण्यात आली होती.

सैन्याने या अ‍ॅप्सवर बंदी घातली आहे

भारत सरकारने 29 जून रोजी 59 चिनी अ‍ॅप्सवर बंदी घातली

सरकारने 29 जून रोजी 59 चिनी अ‍ॅप्सवर बंदी घातली होती. यामध्ये टिक टॉक, यूसी ब्राउझर, हॅलो आणि शेअर इट यांसारख्या अ‍ॅप्सचा समावेश होता. सरकारने सांगितले होते की, या चिनी अॅप्सचे सर्व्हर भारताबाहेर आहेत. यांद्वारे युझर्सच्या डेटाची चोरी केली जात होती. या अ‍ॅप्समुळे देशाची सुरक्षा आणि एकतेला देखील धोका होता.