अमित शहा जानेवारीत 11 राज्यांचा करणार दौरा:भाजपचा मिशन-2024 वर फोकस, सुरुवात ईशान्येपासून

2024 च्या लोकसभा निवडणुकीसाठी सत्ताधारी भाजपने प्रचाराला वेग दिला आहे. त्याची सुरुवात या महिन्यापासूनच होणार आहे. सूत्रांनी दिलेल्या माहितीनुसार, केंद्रीय गृहमंत्री अमित शहा जानेवारीमध्ये लोकसभा प्रवास नावाच्या सरावाचा एक भाग म्हणून 11 राज्यांचा दौरा करणार आहेत. त्याची सुरुवात ईशान्येपासून होईल.

शहा 5 आणि 6 जानेवारीला त्रिपुरा, नागालँड आणि मणिपूरला भेट देतील. 7 जानेवारीला छत्तीसगड आणि झारखंडला जाणार आहेत. त्यानंतर ते 8 जानेवारीला आंध्र प्रदेशला भेट देण्यासाठी दक्षिणेकडे प्रयाण करतील. शहा 28 जानेवारी रोजी कर्नाटकला भेट देण्याची शक्यता आहे, जिथे या वर्षाच्या अखेरीस पुन्हा मतदान होणार आहे.

शहा उत्तर प्रदेश आणि बंगाललाही भेट देणार
या यादीत उत्तर प्रदेश आणि पश्चिम बंगालचीही नावे आहेत. 16 आणि 17 जानेवारीला शहा या राज्यांना भेट देणार आहेत. महिन्याच्या शेवटी भाजपचे वरिष्ठ नेते हरियाणा आणि पंजाबला भेट देतील. शहा यांचा प्रचार हा भाजपच्या 2024 च्या मिशन 350 चा एक भाग आहे. पुढील वर्षी होणाऱ्या सार्वत्रिक निवडणुकीत 543 लोकसभा जागांपैकी किमान 350 जागा जिंकण्याचे पक्षाचे लक्ष्य आहे.

भाजप प्रमुखांचा ओडिशा दौरा
मीडिया रिपोर्ट्सनुसार, पक्ष 160 मतदारसंघ ओळखत आहे जिथे भाजप गेल्या निवडणुकीत कमी फरकाने जिंकले किंवा हरले. गेल्या महिन्यात भाजपचे प्रमुख जेपी नड्डा यांनी ओडिशासारख्या राज्यांचा दौरा केला होता. काँग्रेसच्या भारत जोडो यात्रेकडे देशवासीयांचे लक्ष लागलेले असताना भाजप लोकांमध्ये जाऊन त्यांचे म्हणणे ऐकत आहे. सुमारे तीन हजार किलोमीटरचे अंतर कापल्यानंतर काँग्रेसची यात्रा आज उत्तर प्रदेशात दाखल झाली आहे.