दिलासा:आसारामला मिळाला जामीन; सर्वोच्च न्यायालयात दिली होती बनावट प्रमाणपत्रे, तुरुंगातून बाहेर येण्याची शक्यता किती?

अल्पवयीन विद्यार्थिनीवर बलात्कार करणाऱ्या आसारामला सोमवारी जोधपूर उच्च न्यायालयातून जामीन मिळाला आहे. आसारामने सर्वोच्च न्यायालयात बनावट कागदपत्रे सादर केल्याप्रकरणी हा जामीन मिळाला आहे. आसाराम सध्या बलात्कार प्रकरणात जन्मठेपेची शिक्षा भोगत आहे, त्यामुळे जामीन मिळूनही तो तुरुंगातून बाहेर पडू शकणार नाही.

त्यावर सुनावणी करताना न्यायमूर्ती कुलदीप माथूर यांनी जामीन देण्याचे आदेश दिले. वकील नीलकमल बोहरा आणि गोकुलेश बोहरा यांनी आसारामची बाजू मांडली.

2017 मध्ये सुप्रीम कोर्टात आसारामच्या वतीने जोधपूर सेंट्रल जेलच्या दवाखान्याचे वैद्यकीय प्रमाणपत्र सादर करण्यात आले होते, ज्यामध्ये आसारामच्या अनेक गंभीर आजारांचा उल्लेख करण्यात आला होता. सर्वोच्च न्यायालयाने या प्रमाणपत्राची चौकशी केली असता हे प्रकरण बनावट असल्याचे निष्पन्न झाले.

सर्वोच्च न्यायालयाच्या आदेशानुसार आसारामचे वकील रवी राय यांच्याविरुद्ध जोधपूरच्या रतनदा पोलिस ठाण्यात एफआयआर दाखल करण्यात आला आणि आसारामलाही या प्रकरणात आरोपी करण्यात आले.

या प्रकरणी आसारामला 18 जानेवारी रोजी सीजेएम मेट्रो कोर्टात हजर करण्यात आले होते. न्यायालयात आसाराम याच्यावर आरोप निश्चित करण्यात आले. यानंतर आसारामच्या वकिलाने हायकोर्टात जामीन अर्ज दाखल केला होता. याच याचिकेवर आज सुनावणी झाली.