भूपेंद्र पटेल दुस-यांदा गुजरातचे मुख्यमंत्री होणार:भाजपच्या विधिमंडळ बैठकीत शिक्कामोर्तब, आजच राज्यपालांची भेट घेणार

गुजरातच्या मुख्यमंत्रीपदासाठी भूपेंद्र पटेल यांची पुन्हा एकदा निवड झाली आहे. शनिवारी गांधीनगर येथील कमलम कार्यालयात विधिमंडळ पक्षाच्या बैठकीत त्यांच्या नावाला एकमताने मंजुरी देण्यात आली. संरक्षण मंत्री राजनाथ सिंह यांच्या अध्यक्षतेखाली आमदारांच्या पक्षाची बैठक बोलावण्यात आली होती. या बैठकीला कर्नाटकचे माजी मुख्यमंत्री येडियुरप्पा आणि केंद्रीय मंत्री अर्जुन मुंडा निरीक्षक म्हणून उपस्थित होते. भूपेंद्र पटेल आजच राज्यपालांना भेटून सरकार स्थापनेचा दावा करणार आहेत.

सोमवारी होणार मुख्यमंत्री पदाची शपथ
शुक्रवारी, गुजरातचे मुख्यमंत्री भूपेंद्र पटेल आणि त्यांच्या संपूर्ण मंत्रिमंडळाने राज्यात नवीन सरकार स्थापनेपूर्वी औपचारिकपणे राजीनामा दिला. भूपेंद्र पटेल 12 डिसेंबर रोजी गांधीनगर येथील हेलिपॅड मैदानावर मुख्यमंत्रीपदाची शपथ घेणार आहेत. विशेष म्हणजे गुजरातमधील विधानसभेच्या 182 पैकी 156 जागा जिंकून भाजपने ऐतिहासिक विजय नोंदवला आहे.

भूपेंद्र पटेल यांची निवड ही केवळ औपचारिकता होती
विधिमंडळ पक्षाचे नेते म्हणून भूपेंद्र पटेल यांची निवड ही केवळ औपचारिकता होती, कारण पक्षाने निवडणुकीपूर्वीच पटेल यांची राज्याचे नवे मुख्यमंत्री म्हणून घोषणा केली होती. भाजपचे प्रदेशाध्यक्ष पाटील यांनी गुरुवारीच पटेल पुन्हा एकदा राज्याचे मुख्यमंत्री होणार असल्याची पुष्टी केली होती. त्यांनी जाहीर केले होते की 12 डिसेंबर रोजी पटेल मुख्यमंत्री पदाची शपथ घेतील. पंतप्रधान नरेंद्र मोदी आणि गृहमंत्री अमित शहा तसेच भाजपशासित राज्यांचे मुख्यमंत्रीही या कार्यक्रमाला उपस्थित राहणार आहेत.

भाजपचा ऐतिहासिक विजय
1962 मध्ये गुजरातमध्ये पहिल्यांदा विधानसभा निवडणुका झाल्या. त्यानंतर, गेल्या 60 वर्षांत असे कधीही घडले नाही, जेव्हा एखाद्या पक्षाने गुजरातमध्ये 150 किंवा त्याहून अधिक जागा जिंकल्या असतील. गुजरातमध्ये 182 पैकी 156 जागा जिंकून भाजपने यावेळी नवा इतिहास रचला आहे. तर काँग्रेसला 17, आम आदमी पार्टीला 5 आणि इतरांना चार जागा मिळाल्या आहेत.

सर्वात मोठ्या विजयाचा विक्रम काँग्रेसच्या नावावर होता
गुजरातमध्ये आतापर्यंत सर्वाधिक जागा जिंकण्याचा विक्रम काँग्रेस पक्षाच्या नावावर होता. 1985 च्या निवडणुकीत काँग्रेसला 149 जागा मिळाल्या होत्या. पण, यावेळी काँग्रेसने सर्वात कमी जागा जिंकण्याचा विक्रम केला आहे. 1990 च्या निवडणुकीत काँग्रेसला केवळ 33 जागा जिंकता आल्या होत्या. मात्र यावेळी ते 17 पेक्षाही कमी जागांवर पोहोचले आहेत. दुसरीकडे भाजपने आज गुजरातमध्ये अनेक नवे विक्रम रचले आहेत. सलग सातव्यांदा राज्यातील विधानसभा निवडणुका जिंकणारा भाजप हा देशातील दुसरा असा पक्ष ठरला आहे. यापूर्वी, डाव्या पक्ष सीपीएमने सलग 7 वेळा निवडणुका जिंकून पश्चिम बंगालमध्ये आपले सरकार स्थापन केले होते.